Qazaqstanda avtobýs parkteri tabysynyń úshten birin joǵaltty
NUR-SULTAN. QazAqparat – Qazaqstandaǵy avtobýs parkteri tabysynyń úshten birin joǵaltsa, taksoparkter tabysy 80%-ǵa azaıǵan. Al avtokóliktik jáne qalalyq elektr kóligimen jolaýshy tasymaldaý- 37%-ǵa, jolaýshylar aınalymy - 38%-ǵa tómendedi, dep habarlaıdy QazAqparat tilshisi ranking.kz aqparat kózine silteme jasap.
Koronavırýs indeti shyqqannan keıin avtokólik jáne qalalyq elektr kóligimen jolaýshy tasymaldaý 36,7%-ǵa, naqtyraq aıtqanda 2020 jyldyń qańtar-mamyr aılarynda 5,9 mlrd jolaýshyǵa azaıdy. Jolaýshy tasymaly birden 37,7%-ǵa kemip, 63,9 mlrd jolaýshy-shaqyrymǵa qysqardy.
Avtokólik jáne qalalyq elektr kóligimen tasymaldanǵan jolaýshylardyń basym bóligi avtobýstarǵa tıesili bolatyn: 2020 jyldyń qańtar-mamyr aılarynda 4,4 mlrd jolaýshyǵa tómendedi. Sondaı-aq dál osy avtobýs parkteri eń úlken quldyraýdy kórip, birden 38,6%-ǵa azaıdy.
Onyń izimen taksı qyzmeti úlken shyǵynǵa ushyrap otyr. Ótken jyldyń kórsetkishimen salystyrǵanda 1,5 mlrd jolaýshy tasymaldap, 30,3%-ǵa qysqarǵan. Bárinen buryn tramvaı tasymaly eń tómengi qysqarý deńgeıin (17,3%) kórsetip, 10,3 mln jolaýshyny quraǵan.
Avtokólik jáne qalalyq elektr kóligi kásiporyndarynyń tabysy 7,9%-ǵa, 2020 jyldyń qańtar-mamyr aılarynda 95 mlrd teńgege tómendedi. Júk tasymalynan keletin kiris 9,7%-ǵa ósse, jolaýshylar tasymalynan túsetin kiris 32,6%-ǵa azaıyp, 2020 jyldyń qańtar-mamyr aılarynda 28,9 mlrd teńgege azaıǵan.
Jolaýshylar tasymalynan túsetin tabystyń 90 paıyzy avtobýstarǵa tıesili. Olardyń tabys kórsetkishi 26 mlrd teńgeni kórsetip, ótken jyldan qaraǵanda 30,4%-ǵa azaıdy. Sonymen birge taksı tabysy 83,8%-ǵa tómendep, 389,2 mln teńgeni kórsetken.
