Qazaqstanda Avstralııadan jetkizilgen et ónimderin saýdalaýǵa tyıym salyndy
ASTANA. QazAqparat - Búginnen bastap Qazaqstanda Avstralııadan jetkizilgen et ónimderin saýdalaýǵa tyıym salyndy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR EBJM Syrtqy saýda qyzmeti departamentiniń dırektory Álııa Álimbetova málim etti.
«Bizde birqatar shekteý engizildi. Olar Tutynýshylar quqyǵyn qorǵaý agenttigi tarapynan engizilip otyr. Búginnen bastap et ónimderin satýǵa shekteý engizildi. Birinshi kezekte bul Avstralııadan ákelinetin sıyr etine qatysty», - dedi ol BAQ ókilderiniń saýalyna oraı. Onyń aıtýynsha, atalǵan elden jetkizilgen et sanıtarlyq-epıdemıologııalyq saraptamadan ótpeı qalǵan. «Onda adam densaýlyǵy úshin qaýipti trenbolon atsetat preparaty shekti deńgeıden asyp ketedi. Bul ósim gormony. Dál osy kórsetkish úshin atalǵan et ónimderin tasymaldaýǵa shekteý engizilip otyr», - dedi ol. Aıta keteıik, búgin QR Tutynýshylar quqyǵyn qorǵaý agenttigi «Qara Angýs eti» saýda ataýymen jetkizilgen sıyrdyń salqyndatylǵan etin ákelýge jáne satýǵa ýaqytsha shekteý engizilgenin jarııa etken bolatyn.
