Qazaqstanda avıatsııalyq jumystar tek sertıfıkatpen ǵana júrgizilýi tıis
ASTANA. KAZINFORM — Tıisti ruqsat berý qujattarynsyz avıatsııalyq jumystardy oryndaýdyń yqtımal jaǵdaılarynyń aldyn alý maqsatynda Azamattyq avıatsııa komıteti(AAK) jáne «Qazaqstannyń avıatsııalyq ákimshiligi» AQ (QAÁ) Qazaqstan Respýblıkasy zańnamasynyń talaptaryn qatań saqtaý qajettiligin jáne belgilengen normalardy buza otyryp qyzmetti júzege asyrýǵa jol berilmeıtinin eskertti. Bul týraly Kólik mınıstrligi málim etti.
— Avıatsııalyq jumystardy belgilengen tártippen berilgen, avıatsııalyq jumystardy oryndaý quqyǵyna qoldanystaǵy kýáligi bar sertıfıkattalǵan paıdalanýshylar ǵana oryndaı alady. Atalǵan kýáliksiz, sondaı-aq tıisti paıdalaný spetsıfıkatsııalarynsyz avıatsııalyq jumystardy júzege asyrý Qazaqstan Respýblıkasy zańnamasyn buzý bolyp tabylady jáne Qazaqstan Respýblıkasynyń zańnamasynda belgilengen tártippen jaýaptylyqqa tartylady, — delingen habarlamada.
Paıdalanýshylar kelesi talaptardy qamtamasyz etýge mindetti:
- avıatsııalyq jumystardy oryndaý quqyǵyna arnalǵan qoldanystaǵy kýáliktiń bolýy;
- áýe kemeleriniń ushýǵa jaramdylyq talaptaryna sáıkestigi;
- ushýdy oryndaýǵa ruqsat jáne avıatsııa personalynyń biliktiligi;
- azamattyq quqyqtyq jaýapkershilikti mindetti saqtandyrýdyń bolýy;
- belgilengen meteorologııalyq mınımýmdar men paıdalaný shekteýlerin qosa alǵanda, ushý qaýipsizdigi jónindegi talaptardy saqtaý.
AAK jáne QAÁ avıatsııalyq jumystar salasyndaǵy zańsyz qyzmet ushý qaýipsizdigine, adamdardyń ómiri men densaýlyǵyna, sondaı-aq múlikke tikeleı qater tóndiretinin atap kórsetedi.
Avıatsııalyq jumystardy tıisti sertıfıkattaýsyz júzege asyratyn tulǵalar men uıymdarǵa qatysty áýe kemelerin paıdalanýǵa tyıym salýǵa jáne materıaldardy quqyq qorǵaý organdaryna berýge deıin ákimshilik yqpal etý sharalary qoldanylatyn bolady. AAK jáne QAÁ azamattyq áýe kemeleriniń paıdalanýshylaryn Qazaqstan Respýblıkasy zańnamasynyń talaptaryn qatań saqtaýǵa jáne qyzmetti tek qoldanystaǵy ruqsat berý qujattary bolǵan jaǵdaıda ǵana júzege asyrýǵa shaqyrady.
Buǵan deıin Qazaqstan avıatsııasynda bıometrııa men tsıfrlyq júk tasymaly engiziletinin jazdyq.
