Qazaqstanda Avıatsııalyq ǵylymı-zertteý ınstıtýty qurylady
ASTANA. KAZINFORM — Memleket basshysynyń tapsyrmasy aıasynda bıyl Avıatsııalyq ǵylymı-zertteý ınstıtýty qurylady. Bul týraly Ǵylym jáne joǵary bilim vıtse-mınıstri Gúlzat Kóbenova Úkimette málimdedi.
— Atalǵan ǵylymı-zertteý ınstıtýtynda avıatsııalyq qaýipsizdik, tsıfrlandyrý jáne jasandy ıntellekt, ushqyshsyz avıatsııalyq júıeler, sondaı-aq avıatsııanyń ekologııalyq turaqty damýy sııaqty basym baǵyttarǵa nazar aýdarylmaq, — dedi vıtse-mınıstr.
Sonymen birge, qazir Parlamentte avıatsııalyq kadrlar daıarlaý júıesin jetildirýge baǵyttalǵan zańnamalyq ózgerister qaralyp jatyr. Olar halyqaralyq standarttardy engizýge, túlekterdiń eńbek óteý mindettemesine jáne avıatsııalyq ǵylymdy damytýǵa baǵyttalǵan.
Bul sharalar azamattyq avıatsııa salasyn joǵary bilikti, básekege qabiletti otandyq kadrlarmen qamtamasyz etýge múmkindik beredi.
— Ǵylymı-zertteý baǵyty da belsendi damyp jatyr. Sońǵy jyldary avıatsııa salasynda 45 ǵylymı joba iske asyrylyp, ǵylymı zerthanalar ashyldy. Qytaı, Túrkııa jáne Ázerbaıjan ǵylymı ortalyqtarymen birlesken jobalar iske asyrylyp jatyr, — dedi Gúlzat Kóbenova.
Aıta keteıik, Almatydaǵy Azamattyq avıatsııa akademııasyna bólinetin grant sany jyldan-jylǵa artyp keledi. Túlekterdi jumysqa ornalastyrý kórsetkishi de 90% jetken.
