Qazaqstanda avıakompanııalar ishki avıabaǵdarlar boıynsha ushýlardy biliktilik talaptarǵa saı bolǵan jaǵdaıda ǵana júzege asyra alady
ASTANA. 5 naýryz. QazAqparat - Avıakompanııalarǵa turaqty ishki kommertsııalyq áýe tasymaldaryn oryndaýǵa ruqsat berýdiń jańa erejesi bekitildi.
Atalǵan erejege sáıkes, avıakompanııalar ishki avıabaǵdarlar boıynsha ushýlardy biliktilik talaptarǵa saı bolǵan jaǵdaıda ǵana júzege asyra alady.
Qujatty ázirleý barysynda ushý qaýipsizdigin qamtamasyz etý basty nazarǵa alyndy.
Aıtalyq, avıakompanııalar bul erejege boıynsha ózderiniń qyzmetterin sáıkestendirip, Halyqaralyq áýe kóligi qaýymdastyǵynyń (IOSA) qaýipsizdik aýdıtiniń óndiristik sertıfıkatyna ıe bolýlary qajet.
Sondaı-aq, ishki baǵyttardyń birinde jolaýshylar men júk tasymaldaýdy júzege asyrýǵa nıet bildirgen avıakompanııalardyń keminde bir jyl jumys tájirıbesi men 3 áýe kemesi bolýy shart. Sońǵy talap ishki turaqty reısti júzege asyratyn avıakompanııanyń jolaýshylar tasymalyn ýaqtyly qamtamasyz etýi úshin engizilip otyr. Jolaýshylarǵa yńǵaıly jaǵdaı jasaý úshin avıakompanııanyń ár áýejaıda óziniń ókildigi jumys istep turýy tıis. Munyń syrtynda, olardyń bıletti brondaý jáne satýmen aınalysatyn bilikti personaly bolýy kerek.
Bul talaptardyń barlyǵy mindetti bolyp tabylady jáne avıakompanııalar turaqty ishki jolaýshylar tasymalyn júzege asyrýǵa ótinish bergen kezde atalǵan barlyq parametrlerge saı bolýy qajet.
Sonymen birge, avıakompanııalarǵa óz qyzmetterin halyqaralyq talaptarǵa saı etýge jáne Halyqaralyq qaýymdastyqtyń aýdıtinen ótýge daıyndalýǵa ýaqyt berildi. Halyqaralyq áýe kóligi qaýymdastyǵynyń (IOSA) qaýipsizdik aýdıtiniń óndiristik sertıfıkatynyń bar ekendigi jónindegi talap 2015 jyldan bastap kúshine enedi.
Anyqtama: Budan burynǵy jyldary turaqty ishki áýe reısterin oryndaýǵa otandyq avıakompanııalar arasynda arnaıy baıqaý uıymdastyrylatyn. Baıqaý qorytyndysy boıynsha qaı tasymaldaýshynyń qandaı baǵdar boıynsha jolaýshylar tasymalyn júzege asyratynyn Komıssııa anyqtaıtyn. Buǵan qosa, avıatasymaldaýshy ózdiginen ushý jıiligin belgileı almaıtyn. Aǵymdaǵy jyldan bastap avıakompanııalar ótinish berý kezinde ushý baǵdary men ushý jıiligin ózderi tańdaıdy, eń bastysy - avıakompanııalardyń ózderi bekitken keste boıynsha ushýlardy júzege asyra alatyn qarjylary bolýy tıis.
