Qazaqstanda Avıatsııalyq qaýipsizdik jónindegi halyqaralyq oqý ortalyǵy ashyldy
ASTANA. 14 tamyz. QazAqparat - Almaty qalasyndaǵy Azamattyq avıatsııa akademııasy Halyqaralyq azamattyq avıatsııa uıymynyń (IKAO) Avıatsııalyq qaýipsizdik jónindegi oqý ortalyǵy retinde bekitildi.
Atalǵan oqý ortalyǵy avıatsııalyq qaýipsizdik salasynda ulttyq jáne aımaqtyq daıyndyq baǵdarlamalaryn júzege asyratyn bolady. Bul týraly Kólik jáne kommýnıkatsııa mınıstrliginen habarlady.
Oqý ortalyǵyn qurý IKAO-nyń qaýipsizdik jónindegi "ISD-Security" baǵdarlamasyn júzege asyrýǵa, sondaı-aq QR aýmaǵynda jáne ortalyq azııa aýmaǵynyń ózge de memleketterinde áýe tasymalynyń qaýipsizdigin arttyrýǵa baǵyttalǵan. Bul áýejaılardyń avıatsııalyq qaýipsizdik qyzmeti men avıakompanııalarǵa mamandar daıarlaýdy jáne qaıta daıarlaýdy júzege asyrýmen aınalysatyn burynǵy keńestik odaq keńistigindegi úshinshi ortalyq ( Kıev pen Máskeýden keıin).
Ortalyq bazasynda «júk qaýipsizdigi», «daǵdarystyq menedjment», «avıatsııalyq qaýipsizdik salasyndaǵy baqylaý-qadaǵalaý qyzmetin júzege asyrýshy ulttyq ınspektorlar» baǵdarlamalary boıynsha qysqa merzimdik (5 kún) jáne ekiaptalyq oqý kýrstary uıymdastyrylatyn bolady. Dáris oqý úshin Qazaqstannyń jáne IKAO-nyń sertıfıkatqa ıe bilikti mamandary shaqyrylady.
Oqý kýrstaryn ótkizý úshin ortalyqta aýmaǵy 550 sharshy metrdi quraıtyn oqý aýdıtorııalary daıyndalǵan. Barlyq aýdıtorııalar kompıýterlendirilgen jáne zamanaýı beıne-aýdıo qurylǵylarmen, ózge de qajetti ádistemelik quraldarmen jaraqtandyrylǵan. Ortalyq Azııa óńiriniń Qazaqstan, Qyrǵyzstan, Ózbekstan sekildi elderimen qatar, ózge de elderiniń avıakompanııalary men áýejaılarynan 3 myńnan astam maman oqý kýrstarynan ótedi dep kútilýde.
Oqý ortalyǵynyń resmı túrde ashylýy IKAO-nyń Eýropa men Soltústik Atlantıka boıynsha óńirlik dırektory Lýıs Fonseka de Almeıdtiń qatysýymen 2013 jylǵy 3 qyrkúıekke josparlanǵan.
