Qazaqstanda avıatsııalyq qaýipsizdik boıynsha aýdıt júrgiziledi
ASTANA. QazAqparat - Halyqaralyq azamattyq avıatsııa uıymynyń (IKAO) Bas hatshysy doktor Fan Lıý Qazaqstanǵa resmı saparymen keldi, dep habarlaıdy QR IDM baspasóz qyzmeti.
IKAO Bas hatshysynyń bul sapary Qazaqstan Respýblıkasy Investıtsııalar jáne damý mınıstrliginiń Azamattyq avıatsııa komıteti men Qazaqstan Respýblıkasynyń Kanadadaǵy elshiliginiń birlesip atqarǵan jumystarynyń nátıjesi. Bul sapar mamandandyrylǵan «AstanaEXPO-2017» halyqaralyq kórmesi aıasynda jasalyp otyr.
Qazirgi ýaqytta Qazaqstannyń IKAO-men yntymaqtastyǵy tıimdi damyp keledi. Burynǵy Bas hatshynyń Astanaǵa alǵashqy resmı sapary 2014 jyldyń qyrkúıeginde jasalǵan bolatyn. Ol sapar eki eldiń yntymaqtastyqqa serpin bergenin aıta ketken jón. IKAO Bas hatshysynyń sapary IKAO men Qazaqstannyń ózara is-qımylynyń joǵary deńgeıde ekenin kórsetedi.
Úsh kúndik sapar aıasynda Qazaqstan Respýblıkasynyń Premer-mınıstri Baqytjan Saǵyntaevpen, sondaı-aq Qazaqstan Respýblıkasy Syrtqy ister mınıstrliginiń jáne Qazaqstan Respýblıkasy Investıtsııalar jáne damý mınıstrliginiń basshylyǵymen resmı kezdesý ótkizýi josparlanǵan.
Sonymen qatar, sapar aıasynda avıatsııa salasynyń ókilderimen de keńes ótkizý josparlanyp otyr. Sapar barysynda Qazaqstan Respýblıkasy men IKAO-nyń budan ary ózara is-qımyldaryna baılanysty birqatar máseleler talqylanbaq.
IKAO-nyń ushý qaýipsizdigi men IKAO-ǵa múshe barlyq elderdiń avıatsııalyq qaýipsizdigine turaqty aýdıt júrgizip, valıdatsııalyq mıssııalar ótkizetinin atap ótý qajet. IKAO-nyń ushý qaýipsizdigi men avıatsııalyq qaýipsizdik boıynsha sońǵy keshendi aýdıti Qazaqstanda 2009 jyly júrgizildi. 2014-2016 jyldary ótkizilgen ushý qaýipsizdigi jónindegi valıdatsııalyq mıssııalar nátıjeleri boıynsha IKAO standarttaryn engizý deńgeıi 74%-ǵa deıin artty. Sonymen qatar, aǵymdaǵy jyldyń qarasha aıynda avıatsııalyq qaýipsizdik boıynsha keshendi aýdıt júrgiziledi dep kútilýde.
