Qazaqstanda aýyr júk kólikterine beriletin arnaıy ruqsat alynyp tastalady
NUR-SULTAN. QazAqparat - Qazaqstanda joldarda belgilengen normadan artyq (ıaǵnı 10 tonnadan) júk tasıtyn aýyr júk kólikterine beriletin ruqsat alynyp tastalady. Bul týraly OKQ-da ótken baspasóz máslıhatynda QR IIDM Kólik komıtetiniń tóraǵasy Samat Gılımov málim etti, dep habarlaıdy QazAqparat tilshisi.
Eske sala ketsek, atalmysh baspasóz máslıhatynda «Qazjol ǴZI» AQ prezıdenti Baǵdat Teltaev jolda bilikterine normadan artyq salmaq túsirip, júre beretin aýyr júk kólikteriniń qyzmetine qatysty másele kótergen bolatyn.
«Avtokólik joldarynyń beriktiginiń saqtalýy, jobalanǵan merzimde qyzmet kórsetýi, avtokólik joldaryna túsetin júkteme máselesi bizdi tolǵandyrýy kerek. Qarap otyrsańyzdar, birneshe bilikti, qos bilikti kólikter, biligine kóp júkteme túsetin kólik túrleri jolymyzda júrip jatyr. Osyndaı aýyr júk kólikteriniń saldarynan joldarymyzdyń qyzmet kórsetý ýaqyty azaıyp ketýi múmkin», - degen edi Baǵdat Teltaev.
Áriptesiniń sózine qosylǵan Samat Gılımov aýyr júk kólikteriniń normadan aýyr júkti tasymaldaýyna qatysty zańnyń saqtala bermeıtinin aıtady.
«Sebebi, bul zań óte durys bolǵanymen, ony buzýshylardyń sany kúnnen kúnge artyp keledi. Biz sheteldik aýyr júk kólikterin kirgizbeńizder nemese paıdalanýǵa bolmaıdy dep eshqandaı shekteý qoıa almaımyz. Olar máselen kómir kenishiniń aýmaǵynda óziniń belgilengen jerinde aýyr júk kóligin paıdalanýy kerek. Al biraq jalpy jurt paıdalanatyn jolda bilik salmaǵy aýyr kólikterge júrýge bolmaıdy. Mysaly, men sizderge aıtaıyn: 25 tonnalyq júk kóliginiń jalpy jurt paıdalanatyn joldardyń ústimen tipti 1 tonna da júk tıep júrýine bolmaıdy», - dedi Samat Gılımov OKQ-da ótken baspasóz máslıhatynda.
Samat Gılımov sondaı-aq jaqynda ǵana Qaraǵandy oblysynda asfaltqa batyp qalǵan «KamAZdardyń» jaıyna qatysty pikirin bildirdi.
«Bul jergilikti jol bolǵanymen, 40-60 tonna júk tıegen aýyr júk kólikteri joldyń ortasyna sińip ketip jatyr. Mine, sol sebepti Senatta qol qoıylyp jatqan zań boıynsha, bólinetin júkke (máselen, qıyrshyq tas) arnaıy ruqsat berýden bas tartamyz. Zańǵa qol qoıylsa, aýyr júk kólikterin bul joldarmen júrgizbeımiz dep esepteımiz», - dedi Kólik komıtetiniń tóraǵasy.
