Qazaqstanda aýyr organıkalyq zattardy kádege jaratatyn zaýyt salynady
ASTANA. QazAqparat - Qazaqstanda aýyr organıkalyq zattardy kádege jaratatyn zaýyt salynady. Bul týraly búgin QR Qorshaǵan orta jáne sý resýrstary mınıstrliginiń jaýapty hatshysy Anatolıı Dernovoı málim etti.
«QR Úkimetiniń BUU Damý baǵdarlamasymen birlesken jobasynda aýyr organıkalyq lastandyrǵyshtardy kádege jaratý zaýytyn salý qarastyrylǵan. Bul qaldyqtar elimizde birshama jınaqtalyp otyr. Atalǵan zaýytty salý tek Qazaqstannyń ǵana emes sonymen birge kórshiles elderdiń de problemasyn sheshýge múmkindik beredi», - dedi ol QR Qorshaǵan orta jáne sý resýrstary mınıstrligi, BUU Damý baǵdarlamasy jáne Ǵalamdyq ekologııalyq qordyń Aýyr organıkalyq lastandyrǵyshtar týraly Stokgolm konventsııasy boıynsha mindettemelerdi iske asyrýdyń ulttyq josparyn jańǵyrtýǵa ári medıtsınalyq qaldyqtardy tıimdi basqarýǵa baǵyttalǵan birlesken jobanyń bastalýyna arnalǵan jıynda.
Onyń atap ótýinshe, atalǵan joba Qazaqstan kóshbasshysynyń jasyl ekonomıka baǵdarlamasyn bekitý aıasynda aıqyndalǵan problemalardy sheshýge septigin tıgizbek.
«Ázirshe jobalyq-smetalyq qujattamasy ázirlený ústinde. Ol zaýyt qunyn aıqyndaýǵa múmkindik beredi. Onyń qurylysy BUU Damý baǵdarlamasynyń donory jáne Qazaqstan Respýblıkasynyń bıýdjeti esebinen qarjylandyrylady. Zaýyt qýaty basqa da elderdiń de ótinimderi boıynsha osyndaı qaldyqtaryn kádege jaratý sharalaryn júrgizýge múmkindik beredi», - dedi A.Dernovoı.
