Qazaqstanda aýyr qylmystar jasalý yqtımaldyǵy barysynda baılanys jelilerine shekteý engiziledi - UQK
ASTANA. QazAqparat - Qazaqstanda aýyr qylmystar jasalý yqtımaldyǵy barysynda baılanysqa shekteýler engizilýi múmkin.
Búgin Parlament Májilisinde «Qazaqstan Respýblıkasynyń keıbir zańnamalyq aktilerine ekstremızm jáne terrorızm máseleleri boıynsha ózgerister men tolyqtyrýlar engizý týraly» zań jobasynyń tanystyrylymy QR Ulttyq qaýipsizdik komıteti tóraǵasynyń orynbasary Marat Qolqobaev málimdedi.
«Zań jobasy aıasynda «Baılanystar týraly» zańyna da ózgerister engizý kózdeledi. Atap aıtqanda, jedel-izdestirý qyzmetin júzege asyratyn organdarǵa keıinge ysyrýǵa bolmaıtyn, aýyr jáne asa aýyr qylmystar jasalý yqtımaldyǵy zor oqıǵalarǵa oraı baılanys jelilerine, olardyń jelileri men baılanys quraldarynyń jumysyn toqtatýǵa múmkindik berý qarastyrylady. Sonymen qatar, dál osyndaı sharalar Bas prokýratýraǵa 24 saǵat barysynda eskertý habarlamasyn bere otyryp, qylmystyq toptardyń ázirlenip jatqan qylmystary nemese yqtımal qylmystary boıynsha da qabyldanatyn bolady», - dedi UQK ókili.
Budan bólek, uıaly baılanys jelilerinde birdeı IMEI-kodtardy paıdalanýdy jáne Qazaqstanǵa abonenttik qurylǵylarda birdeı osyndaı kodtardy paıdalanýǵa jol bermeý maqsatynda elimizdiń aýmaǵynda qyzmet kórsetetin jáne elimizge ákelinetin barlyq qurylǵylardyń IMEI-kodtarynyń biryńǵaı bazasyn qurý qarastyrylady. Bunymen qosa, paıdalanýshylardyń abonenttik nómirlerine qatysty tirkeýler engizý júrgiziledi.
«Bul shara quqyq qorǵaý jáne arnaıy organdardyń qyzyǵýshylyq tanytqan nysandardy jedel anyqtaýǵa, elimizge kontrafaktilik ónimderdiń kelýin tómendetýge, bótenniń zatyn urlaýdyń aldyn alýǵa septigin tıgizbek. Tirkeýden ótpegen abonenttik nómirlerdi anyqtaý úshin ókiletti organǵa baılanys qyzmetiniń abonentteri týraly qyzmettik aqparatqa qoljetimdiligi qamtamasyz etiledi», dedi M. Qolqobaev.
