Qazaqstanda aýyr dertke shaldyqqan balalardyń armanyn oryndaıtyn qor quryldy

NUR-SULTAN. QazAqparat – Qazaqstanda aýyr dertke shaldyqqan 3-18 jas aralyǵyndaǵy balalardyń armanyn oryndaýmen aınalysatyn «Menin Armanym» atty korporatıvti qor quryldy, dep habarlaıdy QazAqparat tilshisi.

Qazaqstanda aýyr dertke, jazylmas dertke shaldyqqan myńdaǵan bala bar. Olardyń arasynda jaryq dúnıemen qoshtasýyna sanaýly jyldar, tipti sanaýly aılar qalǵandary qanshama. Atalǵan qaıyrymdylyq jobasynyń maqsaty – aýyr dertke shaldyqqan balalardyń armanyn kózi tirisinde oryndaýǵa atsalysý.

Joba balalardyń mynadaı armanyn ornydaýǵa daıyn:

- «Ýaqytsha ... bolǵym keledi» (ǵalym, polıtsııa qyzmetkeri, aspaz, traktor júrgizýshisi, hanshaıym)

- «... barǵym keledi» (zoobaqqa, murajaıǵa, basqa qalaǵa, teatrǵa, telebaǵdarlama túsirilimine)

- «... kezdeskim keledi nemese qoltańbasyn alǵym keledi» (súıikti sportshymmen, ánshimen, telejúrgizýshimen, saıasatkermen nemese basqa da tanymal qazaqstandyq tulǵamen)

- «Atap ótkim keledi» (týǵan kún, jańa jyl, toı)

«Aýyr dertke shaldyqqan balalardyń mundaı armanyn jobaǵa demeýshi bolý arqyly, volonterlik qozǵalysqa nemese Qazaqstan aýmaǵynda qaıyrymdylyq baǵytynda jumys isteıtin uıymǵa múshe bolý arqyly júzege asyrýǵa bolady. Atalǵan qor balalardyń armanyn júzege asyrý úshin qarajat jınaýmen aınalysady. Jınalǵan qarajat balalarǵa syılyq alýǵa nemese dertin emdeýge jumsalady», - deıdi jobanyń medıa-koordınatory Oljas Esbolov.

«Menin Armanym» jobasyna kóp alǵys aıtamyn. Osy joba arqyly meniń tilegim oryndaldy. Meniń armanym – taýǵa shyǵý, bloger bolý jáne Qazaqstannyń bedeldi vaınerleri @nnnurdaylet pen @sadraddinn-di kórý edi. «Menin Armanym» jobasy maǵan tosynsyı jasap, osy úsh tilegimdi oryndady», - deıdi Almatydaǵy onkologııalyq ortalyqta emdelip jatqan 12 jastaǵy Dıdar Berdalıev.

D.Berdalıevtiń anasy ulynyń armany oryndalǵany úshin qýanyshty ekenin aıtýda.

«Dıdar bıyl mamyr aıynan bastap aýyryp qaldy. Tarazda oǵan ota jasaldy. Ol jaqta eki aı emdelip, Almatydaǵy onkologııalyq ortalyqqa keldik. 1 aı boıy hımııaterapııa qabyldaımyz. Negizi ulym 1-synyptan bastap 1, 1,5 aılap aýyratyn. Mán bermeı júre berippiz... Ózim Aqtaý, Atyraýda vahtamen jumys isteımin. Ulym basy aýyratynyn aıtqanda dári bere beretinbiz. 5-synypta qulaǵynan qan aǵyp, qulap qalǵan kezde ǵana qandaı derti bar ekenin bildik. Balam osy joba arqyly úsh armany oryndalatynyn bilgen kezde senbeı, bir jylap aldy. Taýǵa baratyn kıimi joq edi, ony da ýaıymdady. Osy joba aıasynda oǵan kerekti kıimderi de berildi. Bári jaqsy boldy», - deıdi Janat Berdalıeva.