Qazaqstanda aýylsharýashylyq tehnıkasyn qaıta óńdeýge qabyldaý baǵdarlamasy iske qosyldy
NUR-SULTAN. QazAqparat - Búginnen bastap elimizde isten shyqqan aýyl sharýashylyǵy tehnıkasyn qaıta óńdeýge qabyldaýdyń pılottyq baǵdarlamasy iske qosyldy, dep habarlaıdy QazAqparat.
«ÓKM operatory» baspasóz qyzmetineiń málimetinshe, baǵdarlama Qaraǵandy oblysyndaǵy eski kólikterdi qaıta óńdeıtin zaýyt alańynda resmı túrde bastaý aldy. Sharaǵa QR Investıtsııalar jáne damý mınıstrligi, QR ekologııa, geologııa jáne tabıǵı resýrstar mınıstrligi ókilderi, ÓKM operatory basshylyǵy, Qazaqstandyq avtobıznes qaýymdastyǵy men buqaralyq aqparat quraldary ókilderi qatysty.
Tozyǵy jetken agrotehnıkany qabyldaý Qazaqstannyń 10 óńirinde (Petropavl, Qostanaı, Pavlodar, Kókshetaý, Qaraǵandy, Taldyqorǵan, Semeı, Shymkent, Qyzylorda, Taraz) júzege asyrylady.
Aıta ketý kerek pılottyq joba aıasynda kombaındar ázirge Petropavl, Qostanaı, Pavlodar, Kókshetaý qalasynda qabyldanady. Traktorlar men kombaın tapsyrǵandarǵa jeńildik sertıfıkaty beriledi. Jeńildik sertıfıkatynyń quny aýylsharýashylyǵy tehnıkasynyń túri men jıntyǵyna baılanysty 560 myń teńgeden 2 mıllıon teńgege deıin baǵalanady.
Baǵdarlamanyń bastaýyn Aqmola oblysyndaǵy «Rodına» agrofırmasy ashty. Atalǵan sharýa qojalyǵy Qaraǵandydaǵy qabyldaý beketine tozyǵy jetken T402 úlgisindegi shynjyr tabandy 6 traktor ákelip tapsyrdy.
«Tolyq jıyntyqtaǵy tehnıkanyń árqaısysy mıllıon teńgege baǵalandy.
Jeńildik sertıfıkatyn Qazaqstanda qurastyrylǵan sý jańa aýyl sharýashylyǵy tehnıkasyn nemese elimizde shyǵarylǵan avtokólik quralyn satyp alatyn kezde paıdalanýǵa bolady. Sonymen qatar eki sertıfıkatty biriktirýge jáne sertıfıkatty basqa adamnyń atyna tirkeýge (2 retten artyq emes) múmkindik bar. Sertıfıkat tirkelgen sátten bastap onyń qoldanylý merzimi-12 aı», delingen habarlamada.
Kompanııanyń málimdeýinshe, aýyl sharýashylyǵy tehnıkasyn qabyldaýdyń pılottyq baǵdarlamasy aıasynda jyl sońyna deıin 100 traktor men 20 kombaın qabyldaý josparlanyp otyr.
«Tozyǵy jetken agrarlyq tehnıkany qaıta óńdeýge tapsyrý, elimizdegi 80%-ǵa eskirgen aýyl sharýashylyǵy tehnıkasyn jańartýǵa múmkindik beredi. Sonymen qatar ekologııalyq taza kólik quraldaryn óndirýdi yntalandyrady jáne qaıta óńdeýdiń tolyqqandy júıesin qurýǵa yqpal etedi», deligen habarlamada.
Kombaın (zaýyttan shyqqandaǵy massasynan 50%-dan joǵary) - 2 000 000 teńge (tolyq jıyntyq), 50%-dan kem bolsa 1 500 000 teńge (tolyq emes jıyntyq), traktor - 1 000 000 teńge (tolyq jıyntyq), 560 000 tenge (tolyq emes jıyntyq).
