Qazaqstanda aýylsharýashylyq ónimderin óńdeıtin 79 zaýyt salynady
Aýyl sharýashylyǵy vıtse-mınıstri Rústem Qurmanov Pavlodar oblysynyń ákimdiginde Agroónerkásiptik keshendi damytý kartasyn talqylaý boıynsha ótken keńeste málim etkendeı, Qazaqstanǵa syrttan keletin aýylsharýashylyq ónimderi ımportynyń joǵary úlesin, olardy qaıta óńdeý boıynsha otandyq kásiporyndardyń joǵary qýattylyǵyn, sondaı-aq eldiń shıkizattyq áleýetin eskere otyryp, mınıstrlik qaıta óńdeýdiń toǵyz basymdyqty baǵytyn anyqtady. Olarmen búginniń ózinde respýblıka boıynsha 435 kásiporyn men sharýa qojalyqtary aınalysýda. Bul «toǵyzdyqqa» sút, et, teri, jún, maıly daqyldar men dándi daqyldar, jemister men kókónister, qant qyzylshalary men kartopty óńdeý kirdi.
«Atalmysh túrler boıynsha agroóndiris kásiporyndaryn oblystyq jáne aýdandyq deńgeıde ornalastyrýdyń naqty kartasy ázirlendi. Indıkatorlar ákimdiktermen qosa, bıznespen de kelisildi. Kartaǵa sáıkes, jańadan 79 zaýyt salynsa, 80-i jańǵyrtýdy qajet etedi. Jańa zaýyttardyń qurylysy Ońtústik Qazaqstan, Almaty, Pavlodar, Batys Qazaqstan jáne Aqtóbe oblystarynda josparlanýda. Naqty osy óńirlerde shıkizat áleýeti bar.
Aýyl sharýashylyǵy vıtse-mınıstri atap ótkendeı, osy baǵyttaǵy alǵashqy qadam - jumys istep turǵan zaýyttardyń júktemesin arttyrý bolmaq.
«Eger osy sharalardy 2021 jylǵa qaraı iske asyrsaq, irimshiktiń ımporttyq úlesi 70%-dan 51%-ǵa deıin tómendeıdi, sondaı-aq sary maı, súzbelerge qatysty da azaıady», - dedi R.Qurmanov.