Qazaqstanda aýyl turǵyndaryna kepilsiz nesıe berý usynylýda
«Agrarlyq sektordy bankter úshin tartymdy klıent dep aıta almaımyz. Bul saladaǵy nesıeniń 60-70 paıyzy «QazAgro» jelisimen beriledi. Fermerlerdiń biraz bóligi nesıe ala almaı otyr. Osyǵan baılanysty, Prezıdent «Qarapaıym zattar ekonomıkasy» baǵdarlamasy boıynsha kóktemgi egin jumystaryn júrgizýge 100 mlrd teńge bólýdi tapsyrdy. Munda qaryz alýshylar úshin syıaqy mólsherlemesi 6 paıyzdan aspaıdy. «Agrarlyq nesıelik koroporatsııa» AQ operator bolyp bekitildi. Biz agroónerkásiptik keshenniń kepildik saıasatyn ózgertýdi usynǵan edik. Endi oǵan oǵan saıası sheshimder qajet», - dedi A. Myrzahmetov áleýmettik jelide bergen onlaın suhbatta.
Onyń aıtýynsha, agrarlyq sektordy tsıfrlyq platformaǵa aýystyryp, nesıeni bıznes-josparǵa qaraı berý de usynylǵan.
«Ázirge bankter qyzyǵýshylyq tanyta bastady. Kez kelgen jaǵdaıdan múmkindikter qarastyrýǵa bolady. Pandemııa oqıǵasy ózin-ózi jumyspen qamtyǵan 4 mln 200 myń adamnyń qaı salalarda jumys istep júrgenin anyqtap berdi. Qazir olardyń barlyǵy esepke alynǵan. Olardyń 60 paıyzy nemese 2,6 mln adam - aýyl turǵyndary. Bul turǵyndardy oqytyp, mıkronesıeler berýge bolady. Munda kepil qajet emes, biliktiligi men bıznes-jospary mańyzdy bolmaq. Atalǵan usynystar boıynsha jumys istep jatyrmyz», - dedi spıker.
Sonymen birge, A. Myrzahmetov agrarlyq sektorǵa qandaı qoldaý kórsetilip jatqanyn aıtty.
«Un men bıdaı boıynsha kvotalar engizildi. Bul kvotalardy un tartýshylar qaýymdastyǵy taratady. Egistik alqabynan alyp ketý úshin kóptegen oblystarda jedel shtabtar qurylǵan. Qandaı da bir qıyndyq týyndasa, sol ortalyqtarǵa júginýge bolady», - dedi Asqar Myrzahmetov.
