Qazaqstanda aýyl sharýashylyǵy jobalaryna ınvestıtsııalyq sýbsıdııalar onyń qunynyń 30 paıyzyna deıin quraıtyn bolady

Bul týraly 2013-2020 jyldarǵa arnalǵan «Agrobıznes-2020» agroónerkásiptik keshendi damytýǵa arnalǵan baǵdarlama jobasy talqylanǵan QR Parlamenti Májilisiniń agrarlyq máseleler jónindegi komıtetiniń keńeıtilgen otyrysynda QR aýyl sharýashylyǵy mınıstri Asyljan Mamytbekov málim etti.

«Jańa qural - ınvestıtsııalyq sýbsıdııa paıda bolady. Bul biz úshin tyń nárse bolǵanmen álemde burynnan bar. Mundaı qural Batys Eýropa elderinde belsendi qoldanylýda, tipti TMD elderinde de bar. Máselen, Reseıdiń Bashqurtstanynda «500 ferma» baǵdarlamasy bar, aımaqtyq bıýdjet ınvestıtsııanyń 50 paıyzyn jańa taýarly-sút fermasyn paıdalanýǵa bergenderge qaıtaryp berýge mindettenedi», - dedi A.Mamytbekov.

Onyń aıtýynsha, kúrdeli óndiris - sútti mal sharýashylyǵymen aınalysatyn qazaqstandyq fermerlerge mundaı qoldaý kórsetpeıinshe,  sheteldiktermen báskelestikke túsý qıyn bolady. Sondyqtan da mundaı qural óte qajet. Qazaqstannyń ońtústiginde mundaı ınvestıtsııalyq sýbsıdııalar tamshylata sýarýdy engizýge, jerdi túbegeıli jaqsartýǵa, melıoratıvtik jelilerdi jaqsartýǵa kómektesedi.

Mınıstr sondaı-aq ınvestıtsılyq sýbsıdııalar baǵdarlama jobasyna sáıkes joba qunynyń 30 paıyzyna deıin jetetinin málim etti.