Qazaqstanda aýyl sharýashylyǵy tehnıkasyn nesıelendirýdiń jańa tásili paıda boldy
«Bıyl jańa júıe iske qosyldy. Bul aýyl sharýashylyǵy tehnıkasyn nesıelik seriktestikter (NS) júıesi arqyly satyp alý. Atalǵan ónim - ekinshi deńgeıli bankter arqyly tabysty júzege asqan avtonesıeleýdiń balamasy.
Buǵan deıin de NS aýyl sharýashylyǵy tehnıkasyn nesıelendiretin edi, biraq nesıeler kepilge ǵana beriletin. Aýyl sharýashylyǵynda kepil qoıý máselelesine baılanysty biz jańa júıe engizý týraly sheshim qabyldadyq. Bul aýyl sharýashylyǵy tehnıkasyn alǵashqy jarnamen satyp alý», - dedi «Agrarlyq nesıe korporatsııasy» AQ basqarýshy dırektory Aıjan Kenjebaeva.
Onyń aıtýynsha, atalǵan ónimniń ereksheligi sol, bastapqy jarna aqshalaı da, jer ýchaskesi, tehnıka, turǵyn úı, avtokólik sekildi kepil túrinde de qabyldanady. «Atalǵan ónimniń dınamıkasyn zertteı kele, onyń sharýalar arasynda tabysty júzege asqanyn tolyq senimmen aıta alamyz. Bıyl 3 aı ishinde bizge 300 mıllıon teńgege ótinim tústi. Bul tek qana tirkelgen ótinimder, qujattar paketin jınap júrgen taǵy kóptegen aýyl sharýashylyq taýar óndirýshileri bar», - dep tolyqtyra tústi Aıjan Kenjebaeva.
Aqmola oblysyndaǵy nesıelik seriktestikter biriniń tóraıymy Baǵıla Burymbaeva nesıeleýdiń jańa tásili engen soń, aýyl sharýashylyǵy tehnıkasyn nesıege alǵysy keletin sharýalar sanynyń kúrt óskenin atap ótti.
«Biz, «Bolashaq» NS alǵashqylardyń biri bolyp, Aqmola oblysynyń Astrahan aýdanynda 2003 jyly quryldyq. 13 jyldan beri jumys istep kelemiz. Nesıelik seriktestikter zańynyń talaby boıynsha, 20 adamnan bastadyq. Qazir bizde 50-den astam adam bar. Eń basty artyqshylyq - kepilzat, sol sebepti búginde «Aýyl sharýashylyǵy tehnıkasyn nesıeleý» baǵdarlamasy nesıelik seriktestikter arqyly óte yńǵaıly» , - deıdi B.Burymbaeva.
Aýyl sharýashylyǵy tehnıkasyn alý úshin tehnıka qunynyń 20% kóleminde bastapqy jarna tólenýi tıis.
«Maǵan usynys jasaldy. Úsh dana traktor alýǵa bolady dedi. Jarnany tólep, úsh tehnıka- traktor, jınaǵysh pen destelegish satyp aldym. Endi anaǵurlym tıimdirek jumys isteı alamyn», - dedi aqmolalyq jeke kásipker Avhad Akaev.
