Qazaqstanda aýyl sharýashylyǵy salasy tehnıkamen qalaı qamtylmaq
ASTANA. QazAqparat - Búgin Úkimet otyrysynda QR Aýyl sharýashylyǵy mınıstrligi agroónerkásiptik keshendi tehnıkamen qamtamasyz etýdiń kartasy jaıynda aıtty, dep habarlaıdy QazAqparat.
Tehnıkalyq qaıta jaraqtandyrý kartasyna toqtalǵan Aýyl sharýashylyǵy birinshi vıtse-mınıstri Qaırat Aıtýǵanov, búginde traktorlardyń 65 paıyzy men kombaındardyń 46 paıyzy boıynsha paıdalaný merzimi 17 jyldan asyp ketkenin jetkizdi. Sonymen birge traktorlardyń 20 paıyzy jumys istemeı tursa, al 26 paıyzyn qoldanystan shyǵarý qajet. Munymen qosa, osyndaı jaǵdaı kombaındar boıynsha da qalyptasyp otyr.
«Tozyǵy jetken tehnıkany paıdalaný men janar-jaǵarmaıǵa jumsalatyn shyǵyndardyń shamamen 20 paıyzǵa artýyna jáne eń bastysy, jalpy jınalymnyń shamamen 14 paıyzǵa nemese shamamen 200 mlrd teńgeni joǵaltýǵa ákelip soqtyrady. Atap aıtqanda, aýyl sharýashylyǵy tehnıkasy boıynsha 20 otandyq óndirýshi 30 paıyzdan joǵary emes deńgeıde júktelgen, al ımport kólemi óndiris kórsetkishinen eki eseden astam artyqtaý. Eger de úlken kombaındar men traktorlardyń ımportyn almastyrýǵa ýaqyt qajet bolsa, onda qazirgi merzimde «shaǵyn mehanızatsııa», ıaǵnı topyraq óńdeıtin ári jem-shóp daıyndaıtyn tehnıka boıynsha jaǵdaıdy ózgertýge qaýqarlymyz. Tek osylar boıynsha ımport jylyna 60 mln AQSh dollaryn qurap otyr», - dedi vıtse-mınıstr.
Q. Aıtýǵanotyń aıtýynsha, AÓK-ti qarqyndy tehnıkalyq qaıta jaraqtandyrý Kartasy aıasynda túpkilikti mólsherlemesi 5%-ǵa deıin otandyq aýyl sharýashylyǵy óndirisine jeńildetilgen nesıe berý baǵdarlamasyn engizý kózdelip otyr. Sonymen qatar aýyl sharýashylyǵy tehnıkalaryn qarqyndy qaıta jaraqtandyrý maqsatynda otandyq tehnıkalardy satyp alý úshin ınvestıtsııalyq sýbsıdııalar mehanızmin ózgertý eskerilgen, bul rette ol satyp alýshyǵa emes, zaýytqa tólenedi. Al óz kezeginde zaýyt sýbsıdııa somasynda tehnıkany satyp alýǵa jeńildik beredi.
«Jalpy, 2021 jylǵa deıin jeńildikti nesıeleýge 217 mlrd teńge qajet bolady. Qarjynyń qaıtarymdylyǵy esebinen aýyl sharýashylyǵy tehnıkasy parkin jańartýdyń ońtaıly deńgeıin qamtamasyz etpekpiz», - dedi ol.
