Qazaqstanda aýyl kitaphanalarynyń qoryn tolyqtyrý aktsııasy bastaldy

NUR-SULTAN. QazAqparat – Qazaqstanda Otbasy kúni qarsańynda aýyl kitaphanalarynyń kitap qoryn tolyqtyrýǵa baǵyttalǵan «Aýylyma kitap» respýblıkalyq qaıyrymdylyq aktsııasy júzege asyrylyp jatyr, dep habarlaıdy QazAqparat tilshisi.

QR Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy», «Rýhanı jańǵyrtý» qazaqstandyq qoǵamdyq damý ınstıtýtynyń Otbasy ınstıtýtyn zerdeleý ortalyǵymen birlese qolǵa alǵan aktsııa osy jyldyń 16 tamyzy men 20 qyrkúıegi aralyǵynda ótkiziledi. Elimizdiń barlyq óńirindegi aýyl kitaphanalaryna kitap jınaý jáne jetkizý is-sharasyna balalardyń bolashaǵyna beı-jaı qaramaıtyn kez kelgen azamat, bastamashy toptar, kommertsııalyq uıymdar shaqyrylady.

Aýyl kitaphanalaryna qazaq, orys jáne aǵylshyn tilderinde jaryq kórgen zamanaýı balalar men jastarǵa arnalǵan ádebıetter kerek. Mundaı basylymdardy kitap ne bolmasa elektrondy tasymaldaǵysh túrinde usynýǵa, sondaı-aq balalar men jasóspirimderdiń damýyna septigin tıgizetin ústel oıyndaryn da berýge bolady.

Jınalǵan kitaptardy «Rýhanı jańǵyr» jobalyq keńesiniń ózińizge taıaý ornalasqan keńsesine ákelýińiz qajet. Al kitaptardyń elektrondyq nuqasyn [e-mail] poshtasyna jibere alasyz.