Qazaqstanda aýtızmmen aýyratyn balalar sany eki ese ósti
«Búginde respýblıkada erekshe bilim berý qajettilikteri bar 175 082-den astam bala esepte tur. Onyń ishinde aýtızmmen aýyratyndar – 8 796 (erekshe bilim berý qajettilikteri bar balalardyń jalpy sanynyń 5%-y). Aıta ketý kerek, aýtızm spektriniń buzylýy dıagnozy qoıylǵan balalardyń sany keıingi bes jylda eki esege jýyq ósti. Jyldarǵa toqtalsaq, 2018 jyly aýtızmmen aýyratyn 4 707 bala anyqtaldy, 2019 jyly – 5 193, 2020 jyly – 6 771, 2021 jyly – 8 796, 2022 jyly – 9 myńnan astam bala», - dep jazdy Serik Jumanǵarın depýtattyq saýalǵa bergen jaýabynda.
Onyń aıtýynsha, elimizdiń 18 joǵary oqý ornynda erekshe kútimdi qajet etetin, onyń ishinde aýtızmi bar balalardy súıemeldeıtin mamandar daıarlaıdy.
«Arnaıy pedagogıka» mamandyǵy Abaı atyndaǵy Almaty ýnıversıteti, Qyzdar ýnıversıteti, S. Amanjolov atyndaǵy ShQO memlekettik ýnıversıteti, M. Qozybaev atyndaǵy SQO memlekettik ýnıversıteti, І. Jansúgirov atyndaǵy Jetisý memlekettik ýnıversıteti, E. Bóketov atyndaǵy Qaraǵandy memlekettik ýnıversıteti, M. Áýezov atyndaǵy OQO ýnıversıteti, M. Dýlatı atyndaǵy Taraz memlekettik ýnıversıteti, «Bolashaq» ýnıversıteti, H. Dosmuhamedov atyndaǵy Atyraý memlekettik ýnıversıteti, OQMPÝ, A. Baıtursynov atyndaǵy Qostanaı memlekettik ýnıversıteti, Sh. Esenov atyndaǵy Aqtaý ýnıversıteti, «Bolashaq» akademııasy, Á. Marǵulan atyndaǵy Pavlodar memlekettik ýnıversıteti, Q. Jubanov atyndaǵy Aqtóbe memlekettik ýnıversıteti jáne «Mıras» ýnıversıteti.
2021-2022 oqý jylynan bastap 5 447 stýdent bilim alyp jatyr. Onyń ishinde bakalavrıatta – 5 004 adam (memlekettik tapsyrys boıynsha – 1 583), magıstratýrada – 402 adam (memlekettik tapsyrys boıynsha – 287), memlekettik tapsyrys boıynsha doktorantýrada – 41 adam.
Bıyl atalǵan mamandyq boıynsha 2 562 maman oqýdy aıaqtady. Joǵary oqý oryndarynda arnaıy pedagogıka (36 – bakalavrıat, 20 – magıstratýra, 2 – doktorantýra) boıynsha, onyń ishinde logopedııa, sýrdopedagogıka, defektologııa boıynsha 58 baǵdarlama ázirlenip, iske asyrylyp jatyr.
«Arnaıy pedagogıka mamandyǵy boıynsha baǵdarlama ázirleýge sala mamandary, ıaǵnı ıntegratsııalanǵan jáne ınklıýzıvti oqytý, balany damytý ortalyqtary, balalar úıleri, ońaltý ortalyqtary, psıhologııalyq-pedagogıkalyq jáne medıtsınalyq-áleýmettik súıemeldeý ortalyqtary, psıhologııalyq-medıtsınalyq-pedagogıkalyq konsýltatsııalar, taǵy sol sııaqty mekeme pedagogteri belsendi tartylady», - dep tolyqtyrdy Úkimet basshysynyń orynbasary.
