Qazaqstanda aýrýhanalar men mektepterdiń teń jartysy múgedekterge beıimdelmegen
ASTANA. QazAqparat - Qazaqstanda aýrýhanalar men mektepterdiń jartysynan kóbi múgedekterge beıimdelmegen, dep habarlaıdy QazAqparat. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova málim etti.
«Múgedektigi bar azamattar úshin ómirlik mańyzy bar 36 myń áleýmettik nysan bar. Olardyń 18,4 myńy nemese 63,6%-i qoljetimsiz. Emhanalardyń, mektep pen áleýmettik qyzmet kórsetý ortalyqtarynyń 62,4%-i múgedekter úshin ıkemdelgen», - dep atap ótti mınıstr.
Onyń málimetteri boıynsha, kólik ınfraqurylymynyń qoljetimdiligi 50 protsentti qurap otyr.
«Osy máseleni sheshý maqsatynda Qazaqstanda áleýmettik taksı belsendi damytylýda. Memlekettik tapsyrysqa engizilgennen keıin, taksopark sany eki jylda segiz esege artty. Jyl saıyn áleýmettik taksoparktar múgedektigi bar 27 myńnan astam azamatqa qyzmet kórsetedi», - dedi T. Dúısenova.
Eńbek mınıstrliginiń aqparatyna sáıkes, múgedektigi bar 16 myńnan astam azamat jeke kómekshiniń qyzmetin paıdalanǵan. Qolǵa alynǵan sharalar áleýmettik jáne kóliktik ınfraqurylymdardyń múgedekter úshin qoljetimdiligi 20-dan 62,4%-ke artqan.
