Qazaqstanda aýmaqtyq qorǵanys týraly zań normalary ne úshin kerek – mınıstrlik jaýap berdi

ASTANA. KAZINFORM – Qorǵanys mınıstriniń birinshi orynbasary Sultan Qamaletdınov aýmaqtyq qorǵanys aıasyndaǵy jańa túzetýler ne úshin kerek ekenin túsindirdi.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń aýmaqtyq qorǵanysy týraly» Zańy maquldandy.

Búgin Senattyń jalpy otyrysynan keıin tilshiler zańnamaǵa «Erikti» jáne «Ózin-ózi qorǵaýdy qalyptastyrý» sııaqty negizgi uǵymdar nege dál qazir engizilip jatqanyn surady.

- Bir sózben jaýap berýge bolady, ıaǵnı aldyn alý sharalary maqsatynda engizilip jatyr... Máselen, 10 jyldan keıin múldem basqa áskerı qurylymdar paıda bolýy múmkin. Sondyqtan atalǵan uǵymdardy dál qazir engizý qajet boldy. Jalpy alǵanda, onyń ishinde áskerı ǵylymnyń damýy álemde jáne óńirde qalyptasyp jatqan geosaıası jaǵdaıǵa baılanysty júzege asady. Eger el azamattary erikti túrde óziniń úıin nemese kásipornyn qorǵaǵysy kelse, bul óz kezeginde quptaıtyn is. Biz osyndaı adamdarǵa nege kedergi jasaýmyz kerek?!, - dedi Sultan Qamaletdınov.

Osy oraıda ol álemdegi geosaıası jaǵdaıdy eskere otyryp, tıisti taldaý jasalǵanyn jáne zańnamaǵa tıisti túzetýler engizilgenin atap ótti.

Zańnyń maqsaty - Qazaqstan Respýblıkasynyń qorǵanys qabiletin arttyrý, halyqtyń, aýmaqtyq qorǵanys obektileriniń qaýipsizdigin qamtamasyz etý jáne Qazaqstan Respýblıkasynyń aýmaǵyn jumyldyrý, soǵys jaǵdaıy kezeńinde ári soǵys ýaqytynda qorǵaý.