Qazaqstanda aýqymdy qurylysqa 6,5 trıllıon teńge jumsalmaq
ASTANA. KAZINFORM — Qazaqstanda «Jalpyhalyqtyq aýqymdy qurylys» baǵdarlamasyn júzege asyrý úshin 2029 jyldyń sońyna deıin Ulttyq qordan 6,5 trıllıon teńge bólý josparlanyp otyr. Bul týraly QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov málimdedi.
Elordada ótken «Jalpyhalyqtyq aýqymdy qurylys — 2027: Qazaqstan ekonomıkasy úshin jańa múmkindikter» atty sarapshylyq talqylaýda Jandos Shaımardanov aldaǵy qurylys jumystarynyń aýqymy men onyń el ekonomıkasyna yqpaly týraly aıtty.
Onyń sózinshe, Memleket basshysynyń Joldaýynda belgilengen mindetterdi júzege asyrý úshin Úkimet birqatar jobany ázirlep qoıǵan.
— Aldaǵy jumystyń aýqymy buryn-sońdy bolmaǵan deńgeıde. 2029 jyldyń sońyna deıin osy úlken baǵdarlamany júzege asyrýǵa Ulttyq qordan 6,5 trıllıon teńge bólý kózdelip otyr. Bul — qomaqty qarjy. Úkimettiń atalǵan bastamany iske asyrýǵa arnalǵan birqatar jobasy qazirdiń ózinde bar ekenin kórip otyrmyz, — dedi Jandos Shaımardanov.
Instıtýt dırektory baǵdarlamanyń alǵashqy kezeńinde áleýmettik mańyzy bar nysandar salýǵa basymdyq beriletinin jetkizdi. Atap aıtqanda, 70-ke jýyq densaýlyq saqtaý nysanyn, bilim berý, sport jáne mádenıet salalaryna arnalǵan 50-ge jýyq nysandy turǵyzý josparlanǵan. Sonymen qatar elimizdiń ár óńirinde jańa perınataldyq ortalyqtar salý kózdelip otyr.
Budan bólek, avtomobıl joldaryn, ınjenerlik jelilerdi, kommýnaldyq ınfraqurylymdy damytýǵa jáne turǵyn úı qurylysyna da edáýir qarajat baǵyttalmaq.
— Bul jumystyń elimizdiń barlyq óńirin qamtıtyny erekshe mańyzdy. Qazir ár óńir boıynsha tıisti josparlar ázirlenip jatyr. Meniń oıymsha, aýqymdy qurylys aımaqtardaǵy ómir sapasyn jaqsartýǵa eleýli yqpal etedi, — dedi ol.
Jandos Shaımardanovtyń aıtýynsha, qurylys baǵdarlamasynyń ekonomıkalyq áseri jańa ǵımarattar men joldardy paıdalanýǵa berýmen shektelmeıdi. Іri jobalar tsement, metall, qurylys konstrýktsııalary men ınjenerlik jabdyqtar shyǵaratyn kásiporyndardyń ónimderine suranysty arttyrady. Sondaı-aq kólik-logıstıka kompanııalary, jobalaý uıymdary jáne shaǵyn jáne orta bıznes úshin qosymsha múmkindikter týǵyzady.
Osyǵan baılanysty ol qurylysqa jumsalatyn qarjynyń el ishinde qalatyn úlesin arttyrý mańyzdy ekenin atap ótti. Aýqymdy jobalar otandyq kásiporyndardyń óndiristik qýatyn keńeıtip, jańa tehnologııalardy ıgerýine jáne jumys oryndaryn ashýyna negiz bolýǵa tıis.
Eske salaıyq, buǵan deıin atalǵan jıynǵa qatysqan «Qazaqstan turǵyn úı kompanııasy» AQ basqarma tóraǵasy Altaı Kúzdibaev elde eski úılerdi jańartý baǵdarlamasy aıasynda turǵyndardyń múddesin qorǵaýǵa arnalǵan jańa kepildik tetigi iske qosylatynyn aıtqan edi.
