Qazaqstanda aýyzashar máziriniń baǵasy qansha
ASTANA. KAZINFORM – Ramazan aıynda óńirlerdegi meıramhana men dámhanada aýyzashar máziri daıyndalady. Kazinform tilshisi baǵa men mázirdi salystyryp, qaıda arzan, al qaı qalada qymbat ekenin bildi.
Qazaqstandyqtar aýyzasharǵa úlken jaýapkershilikpen qaraıdy. Úıde ǵana emes, meıramhana men dámhanalarda da aýyzashar jasap, saýapty is jasaýǵa asyǵady. Qazir meıramhanalar men dámhanalar da suranysqa saı usynys ázirlep qoıǵan. Biri negizgi taǵamdy usynady. Al taǵy biri ystyq tamaq, tátti taǵam, sýsyn men tamaqtaný ornynyń óz syıyn dastarhanǵa qoıady. Aýyzashar máziri elimizdiń óńirlerinde ártúrli jáne baǵasynda da aıyrmashylyq bar.
Eń arzany – Túrkistan qalasynda. Munda aýyzashar máziriniń baǵasy 2 000 – 6 000 teńge aralyǵynda. Sonymen birge qaladaǵy meıramhanalar tórt adamǵa arnalǵan aýyzashar dastarhanynyń qunyn 16 533 teńge dep bekitip te qoıǵan. Oǵan salat, jemis-jıdek, qýyrylǵan balyq, samsanyń birneshe túri, pispenan, nan, shyryn men syılyqqa dep sý, qara nemese kók shaı usynylady. Al eń qymbaty bir adamǵa 11 900 teńge bolyp tur.
Al Petropavl qalasynda aýyzashar máziriniń eń arzany adam basyna – 2 500 – 3 000 teńge. Dastarhan ústi mol bolsyn dese 4 000 – 5 500 teńgeniń mázirin tańdaýǵa bolady. Oǵan manty, samsa, tátti taǵam, qurma, sý men shaı kiredi. Al 5 500 teńge jáne odan joǵary mázirde salattyń birneshe túri, et taǵamy men ulttyq taǵam jáne shyryn bar. Keıbir meıramhanalar 10 000 teńgeniń toptamasyn da usynady.
Aqtóbe qalasy da baǵa qoljetimdi óńirler qataryna kiredi. Munda aýyzashar baǵasy 3 000 – 9 000 teńge aralyǵynda.
Oral qalasynda da baǵa qalypty. Munda aýyzasharǵa ystyq tamaq, salat pen shyryn usynsa, 3 000 – 6 000 teńge bolady. Al aýyzashar toptamasyn tańdasa keıbir tamaqtaný orny 6 000 – 12 000 teńge jáne odan joǵary baǵany usynady. Meıramhanalarda adam basyna 10 000 teńgeniń mázirin kezdestiresiz.
Shymkent qalasynda aýyzashar baǵasy ártúrli. Qaltaǵa kúsh túskenin qalamasańyz, 3 500 – 5 500 teńgeniń mázirin tańdaýǵa bolady. Mázirde negizgi taǵamdar bar. Al meıramhanada 7 000 – 8 000 teńgeniń máziri usynylyp jatyr. Ystyq taǵam, shaı men tiskebasar beredi. Keıbir toptamada et taǵamy bolmaýy da múmkin. Al mol dastarhan jaıylsa adam basyna 14 000 teńge qajet bolady.
Qyzylorda qalasynda eń qoljetimdi baǵa 3 500 – 4 000 teńge bolyp tur. Mázirge kúrish, tiskebasarǵa et, nan jáne túrli qospa kiredi. Ortasha mázir baǵasy – 5 000 – 6 500 teńge. Munda sorpa, samsa, et salynyp qýyrylǵan bálish, salattar men qurma, sý jáne shaı kiredi. Sonymen birge 4-5 adamǵa arnalǵan aýyzashar toptamasyna tapsyrys berýge bolady. Baǵasy – 9 000 – 17 000 teńge. Onda kúrish, manty, qazan-kebab, káýap, salattar men tandyr nan, túrli qospa bar.
Qostanaı qalasynda aýyzashar baǵasynyń aıyrmashyǵyly joǵary. Keıbirinde 3 500 teńge bolsa, taǵy bir meıramhana 12 900 teńgeniń mázirin usynady. Qoljetimidisi – 3 500 – 5 000 teńge. Adamdar kóbine 4 500 – 5 800 teńgeniń mázirin tańdaıdy. Oǵan salat, sorpa, kúrish nemese laǵman kiredi. Qurma, baýyrsaq pen sýdy tegin usynady. Al mol dastarǵa jaıylsa 6 000 – 12 900 teńgeniń toptamasyna tapsyrys bergen jón.
Atyraý qalasynda aýyzashar baǵasy 3 900 – 4 100 teńgeden bastalady. Ortasha baǵa - 5 000 – 7 000 teńge. As mol bolsyn degen adamdar 8 000 – 9 000 teńgeniń toptamasyna tapsyrys beredi. Al eń joǵary baǵa 12 600 – 12 990 teńgege jetti.
Taraz qalasynda aýyzashar mázirine eki túrli salat, ystyq tamaq, tiskebasar, sý men ózge de sýsyn kiredi. Shaǵyn dámhanalarda bul mázirdiń baǵasy 4 000 teńgeden bastalady. Sonymen birge ortasha baǵa munda 5 000 – 6 500 teńge bolyp tur. Joǵary baǵa usynatyn meıramhana az. Bolǵan kúnde aýyzashar toptamasynyń baǵasy ár adamǵa 10 000 – 12 000 teńge.
Óskemen qalasynda bir adamǵa arnalǵan aýyzashar máziriniń baǵasy – 4 500 teńge. Oǵan úı kespesi, qoqat qosylǵan kúrish, qoı etiniń sorpasy, manty, et jáne kókónis qosylǵan salat, tandyr nan, baýyqsaq, kúrish jáne toqash kiredi. Sonymen birge 9 000 – 28 000 teńgeniń aýyzashar toptamasyn da tańdaýǵa bolady. Bul toptama adam sany men as mázirine qaraı tańdalady.
Kókshetaý qalasynda aýyzashar toptamasynyń baǵasy bir adamǵa 4 770 teńgeden bastalyp, 10 000 teńgege deıin jetti. Oǵan salat, sorpa jáne ystyq tamaq kiredi. Baýyrsaq, qurma men sý kóp jerde tegin usynylady.
Semeı qalasyndaǵy tamaqtaný oryndarynda bir adamǵa arnalǵan mázir baǵasy 4 900 – 6 500 teńge. Al birneshe adam bolyp tapsyrys berse adam basyna 7 500 teńge esepteledi. Mázirge ystyq tamaq, birneshe salat, kondıterlik ónimder men jemis-jırek, qurma kiredi. Shaı men sý tegin jáne sheksiz usynylady. Al 10 adamǵa arnalǵan bankettiń baǵasy 55 000 – 62 000 teńge aralyǵynda. Baǵaǵa ystyq taǵamnyń túri áser etedi.
Astanada dámhana men meıramhanalardaǵy aýyzashar baǵasy ár adamǵa 4 990 teńgeden bastalady. Oǵan salat, sorpa men tikebasar, ystyq tamaq, tandyr nan, sý men qurma kiredi. Ortasha baǵa – 8 000 – 10 000 teńge. Al qymbat tamaqtaný oryndarynda baǵa 12 000 teńge jáne odan joǵary.
Taldyqorǵan men Jezqazǵanda bir adamǵa arnalǵan aýyzashar baǵasy 5 000 teńge, keı jerlerde 8 500 – 9 000 teńge. Baǵaǵa mázir quramy áser etedi. Aqtaý qalasyndaǵy azyrashar baǵasy – 5 500 - 7 500 teńge.
Pavlodar qalasyndaǵy keıbir tamaqtaný orny 5 500 – 6 500 teńgeniń aýyzashar mázirin usynady. Oǵan salat, birinshi ystyq tamaq (borş, kespe nemese sorpa), ekinshi ystyq tamaq, nan, baýyrsaq pen sút qatqan shaı kiredi. Qurma men sýdy tegin usynady. Sonymen birge 6 590 teńgeniń de as máziri bar. Ulttyq naqyshtaǵy aýyzashar mázirine samsa, konıterlik ónimder, tátti, keptirilgen jemis, ulttyq sýsyn kiredi. Baǵasy bir adamǵa – 8 000 teńge. Aýyzashar máziriniń qymbaty - 12 000 teńge.
Qonaev qalasynda aýyzashar toptamasynyń quny ár adamǵa – 5 500 – 6 000 teńge. Oǵan sorpa, ystyq tamaq, salat, nan men shyryn kiredi. Keıbir tamaqtaný orny tátti taǵam da usynady.
Almaty qalasyndaǵy meıramhanalarda aýyzashar toptamasy – 6 450 – 8 100 teńge. Sizge sorpa, salattar, taýyq nemese sıyr etinen ystyq tamaq, tátti taǵam usynady. Al baýyrsaq, qurma men sý tegin. Dastarhan mol bolsyn deseńiz, baǵasy – 8 500 teńge. Al et, balyq, salattyń birneshe túri men tátti taǵam, shaı men shyryn alsańyz, baǵasy 12 500 – 16 500 teńge bolady.
Qaraǵandy qalasyndaǵy meıramhanalar Ramazan aıyna túrli mázir daıyndaǵan. Baǵa 6 700 teńgeden bastalady. Qazaq, ózbek, uıǵyr, shyǵys nemese orys taǵamdarynyń toptamasyn usynyp, baǵasyn 8 499 teńge dep bekitken. Sonymen birge 12 499 teńgeniń toptamasyna tapsyrys berýge bolady. Oǵan sorpa, kilegeı qosylǵan albyrt balyǵy, salattar men aspaz ázirlegen tátti taǵam kiredi.
Qazaqstanda qasıetti Ramazan aıy bastaldy. Memleket basshysy Qazaqstan halqyn Ramazan aıynyń bastalýymen quttyqtady.
Elordanyń Qoǵamdyq densaýlyq saqtaý basqarmasy oraza ýaqytynda qalaı tamaqtaný kerektigi týraly keńes berdi.