Qazaqstanda aýylǵa barǵan dárigerlerge eń joǵary tólem qaı óńirde tólenedi
ASTANA. KAZINFORM – 2025 jyly aýylǵa jumysqa barǵan dárigerlerge beriletin birjolǵy tólem boıynsha Mańǵystaý oblysy kósh bastady. Bul óńirde 113 medıtsına qyzmetkeri qoldaý alǵan. Bul týraly QR Densaýlyq saqtaý mınıstrligi Kazinform agenttiginiń tilshisine habarlady.
Elimizdiń 16 óńirinde tapshy mamandyqtar boıynsha 529 medıtsına qyzmetkerine 100 eń tómengi jalaqy kóleminde nemese arttyrylǵan mólsherde birjolǵy tólem berilgen.
— 2025 jyly 100 eń tómengi jalaqy kólemindegi nemese arttyrylǵan mólsherdegi (10 mln teńge) birjolǵy tólemder Qazaqstannyń 16 óńirinde júzege asyryldy. Bul tólemderdi negizinen aýyldyq jerlerge jumys isteýge barǵan 529 medıtsına qyzmetkeri aldy, – dep málimdedi mınıstrlik.
Tólem alǵandar sany boıynsha Mańǵystaý oblysy kósh bastady. Munda 113 medıtsına qyzmetkerine jalpy 960,5 mln teńge tólengen.
Ekinshi orynda – Batys Qazaqstan oblysy. Bul óńirde 67 mamanǵa 569,5 mln teńge berilgen. Úshinshi orynda Atyraý oblysy, munda 57 medıtsına qyzmetkeri 484,5 mln teńge kóleminde qoldaý alǵan.
Jetisý oblysynda birjolǵy tólemniń arttyrylǵan mólsheri – 10 mln teńge berilgen. Bul óńirde 45 medıtsına qyzmetkerine jalpy 450 mln teńge tólengen.
Elimiz boıynsha naqty tólengen qarajat kólemi 4,966 mlrd teńgeni qurady.
Densaýlyq saqtaý mınıstrliginiń málimetinshe, Ulytaý oblysynda tólem mólsheri 8 mln teńgeni quraǵan. Bul kórsetkish zańda belgilengen 100 eń tómengi jalaqydan tómen, sondyqtan baǵdarlama talaptarynyń ishinara oryndalýy retinde baǵalanady.
