Qazaqstanda aýyl sharýashylyǵy tehnıkasynyń tozýy 65%-ǵa deıin tómendeıdi
ALMATY. KAZINFORM — Eýrazııalyq ekonomıkalyq odaq elderinde aýyl sharýashylyǵy tehnıkasynyń óndirisi damyp keledi. Degenmen jekelegen bólshekter boıynsha ımportqa táýeldilik bar.
Bul týraly Eýrazııalyq ekonomıkalyq komıssııanyń Ónerkásip jáne agroónerkásiptik keshen jónindegi mınıstri Goar Barsegıan Almatyda ótken EAEO Agroónerkásiptik saıasat jónindegi keńestiń 7-shi otyrysynda málimdedi.
— Odaqqa múshe memleketter arasynda ózin-ózi qamtamasyz etýdiń joǵary deńgeıi eń aldymen Belarýs Respýblıkasynda baıqalady. Sońǵy jyldary Qazaqstan Respýblıkasynda da óndiris óte qarqyndy damyp jatyr. Basqa da múshe memleketterde ilgerileý bar, — dedi Goar Barsegıan.
Ol EAEO elderi jekelegen bólshekter boıynsha áli de ımportqa táýeldi ekenin jasyrmady.
— Jekelegen bólshekter boıynsha biz áli de ımportqa táýeldimiz, biraq bul zańdy ári qalypty qubylys. Sol sebepti ónerkásip sheńberinde aýyl sharýashylyǵy mashınasyn jasaý boıynsha alǵashqy jobalardy iske qosyp jatyrmyz, — dedi ol.
Onyń aıtýynsha, EAEO naryǵynda aýyl sharýashylyǵy tehnıkasyn óndirýdi damytýǵa baǵyttalǵan kooperatsııalyq birlesken jobalar júzege asyrylyp jatyr. Máselen, birneshe aı buryn kombaındar men basqa da aýyl sharýashylyǵy tehnıkalaryna arnalǵan kabınalardy shyǵarý jobasy tanystyrylǵan. Óndiris kólemin jylyna birneshe myń danaǵa deıin arttyrý josparlanyp otyr. Mınıstrdiń sózinshe, bul — shaǵyn jáne orta bıznestiń qatysýymen qolǵa alynǵan alǵashqy jobalar.
Jıyn aıasynda agenttik Aýyl sharýashylyǵy mınıstrliginiń ókilderinen Qazaqstandaǵy aýyl sharýashylyǵy tehnıkasynyń qansha paıyzy tozǵanyn jáne qanshaýy aýystyrýdy talap etetinin surady.
— Osydan 3-4 jyl buryn aýyl sharýashylyǵy tehnıkasy parkiniń tozýy 80% boldy. Bul másele birtindep artqa ysyrylyp keledi. Óıtkeni 2024 jyldan bastap mınıstrlik aýyl sharýashylyǵy tehnıkasyna jeńildetilgen lızıngtiń baǵdarlamasyn iske qosty. Lızıng jyldyq 5% mólsherlememen 7 jyl merzimge beriledi. 2024 jyly buǵan 120 mıllıard teńge, 2025 jyly — 250 mıllıard, al bıyl 300 mıllıard teńge bólindi, — dedi AShM Eginshilik departamentiniń Tehnıkalyq qamtamasyz etý basqarmasynyń basshysy Baqyt Іlııasov.
Onyń aıtýynsha, bıylǵy egin jınaý naýqanyna 130 myńǵa jýyq traktor, 29 myń astyq jınaıtyn kombaın, 17 myń oraq, 130 myń dana basqa da aspaly ári tirkeme tehnıka jumyldyrylady.
— Bul rette egin jınaý naýqanyna jeńildetilgen lızıng baǵdarlamasymen 2 jylda satyp alǵan 12 myńnan astam traktor men 2 340 kombaın qatysady. Tıisinshe, tehnıkany jańartý deńgeıi artyp keledi. Eski tehnıka esepten shyǵarylyp, kádege jaratýǵa jiberiledi. Jyl sońynda qorytyndy nátıjeler belgili bolady, biraq aýyl sharýashylyǵy tehnıkasy parkiniń tozýy shamamen 65% bolady, — dedi mınıstrlik ókili.
Eske salaıyq, buǵan deıin Eýrazııalyq ekonomıkalyq komıssııanyń Ónerkásip jáne agroónerkásiptik keshen jónindegi mınıstri Goar Barsegıan EAEO elderinde aýyl sharýashylyǵy daqyldary tuqymynyń jekelegen túrleri boıynsha ımportqa táýeldilikti tómendetý úshin memleketter arasyndaǵy yntymaqtastyqty kúsheıtý qajet ekenin atap ótti.
