Qazaqstanda aýyl sharýashylyǵy tehnıkasyn jańartýǵa 350 mlrd teńge bólindi
ASTANA. KAZINFORM — Elimizde agroónerkásiptik keshendi tehnıkalyq qaıta jaraqtandyrý jumystary júıeli túrde qarqyndy qolǵa alynyp jatyr. Bul týraly AShM málim etti.
Memleket basshysynyń tapsyrmasyna sáıkes, Aýyl sharýashylyǵy mınıstrligi aýyl sharýashylyǵy tehnıkasyn jańartý jáne aýyl sharýashylyǵy taýaryn óndirýshilerdiń zamanaýı tehnıkaǵa qoljetimdiligin arttyrý baǵytynda naqty sharalar qabyldaýda.
Osy rette memlekettik qoldaýdyń negizgi tetikteriniń biri — jeńildikti lızıng.
Bıyl baǵdarlamaǵa bólinetin qarjy kólemi byltyrǵy 250 mlrd teńgeden 350 mlrd teńgege deıin ulǵaıtyldy.
Qarjylandyrý kóleminiń artýy mashına-traktor parkin jedeldetip jańartýǵa zor yqpal etýde. Máselen, 2024 jyly jańarý deńgeıi 6%, al 2025 jyly 6,5% bolsa, 2026 jyldyń sońynda bul kórsetkish 8%-ǵa deıin ósedi dep kútilýde.
Oǵan aǵymdaǵy kórsetkishter naqty dálel deýge bolady. 2026 jylǵy tamyzdaǵy jaǵdaı boıynsha jalpy somasy 296,9 mlrd teńgeni quraıtyn 7 362 ótinim qabyldanyp, 265 mlrd teńgege 6 974 qarjylyq lızıng sharty jasaldy.
Nátıjesinde agrarshylarǵa traktorlar, astyq jınaıtyn kombaındar, jemshóp daıyndaıtyn tehnıka jáne aspaly jabdyqtardy qosa alǵanda, 7 925 birlik aýyl sharýashylyǵy tehnıkasy berilmek.
Investıtsııalyq sýbsıdııalaý jáne jeńildikti lızıng baǵdarlamalary aıasynda aýyl sharýashylyǵy taýaryn óndirýshiler Qazaqstanda qurastyrylatyn CLAAS jáne John Deere kompanııalarynyń zamanaýı ári joǵary ónimdi tehnıkasyna qol jetkizdi.
Tehnıkany jańartý aýyl sharýashylyǵy óndirisiniń tıimdiligine tikeleı áser etedi. Zamanaýı mashına-traktor parki sharýashylyqtarǵa egis jáne jıyn-terim jumystaryn ýaqytyly júrgizýge, tıisti merzimderdi saqtaýǵa, eńbek ónimdiligin arttyrýǵa jáne aýyl sharýashylyǵy ónimderiniń shyǵynyn azaıtýǵa múmkindik beredi.
Sonymen qatar tehnıkalyq qaıta jaraqtandyrý óndiristik resýrstardy tıimdi paıdalanýǵa yqpal etedi. Bul qazirgi agrarlyq sektordyń ónimdiligi men básekege qabilettiligine degen talap úrdisinde erekshe mańyzǵa ıe.
Osylaısha, jeńildikti qarjylandyrý kólemin ulǵaıtý tek jańa tehnıkalar sanyn arttyrý ǵana emes, aýyl sharýashylyǵynyń zamanaýı materıaldyq-tehnıkalyq bazasyn qalyptastyrýǵa da baǵyttalǵan. Jeńildikti lızıng baǵdarlamasyn keńeıtý mashına-traktor parkiniń jańarý qarqynyn odan ári jedeldetýge jáne otandyq agroónerkásiptik keshenniń óndiristik áleýetin nyǵaıtýǵa keń jol ashady.
Eske sala keteıik, jaqynda Qazaqstanda egin jınaý naýqany bastaldy.
