Qazaqstanda aýyl sharýashylyǵy tehnıkasyn óndirý 22,3%-ǵa artty
ASTANA. KAZINFORM – Qazaqstanda 2025 jyldyń qorytyndysy boıynsha aýyl sharýashylyǵy tehnıkasyn óndirý kólemi bir jylda 22,3%-ǵa artty, dep habarlaıdy Ulttyq statıstıka bıýrosy.
Bıýro málimetinshe, elimizde aýyl sharýashylyǵy jáne orman sharýashylyǵy tehnıkasyn óndirýmen aınalysatyn 40 kásiporyn men óndiris bar. Óndiris qurylymyndaǵy negizgi úles – 72,5% aýyl sharýashylyǵy mashınalaryna tıesili.
2025 jyly Qazaqstanda 1 236 astyq jınaıtyn kombaın shyǵaryldy. Bul 2024 jylǵy kórsetkishpen salystyrǵanda 13,7%-ǵa kóp.
Óńirler arasynda kombaın óndirisiniń 47,9%-y Aqmola oblysyna tıesili. Qostanaı oblysynyń úlesi – 32%, Soltústik Qazaqstan oblysynyń úlesi – 18%.
– 2025 jyldyń qańtar-maýsym aılarynda 9 astyq jınaıtyn kombaın eksporttaldy. Jyl qorytyndysy boıynsha eksport kólemi 16 birlikti qurady. Astyq jınaıtyn kombaındardyń negizgi eksporttyq baǵyttary Tájikstan, Grýzııa jáne Ózbekstan boldy, – delingen Ulttyq statıstıka bıýrosynyń aqparatynda.
Óndirýshiler aldaǵy kezeńde Qazaqstanda shyǵarylatyn aýyl sharýashylyǵy tehnıkasynyń eksport kólemin odan ári arttyrýdy josparlap otyr.
Aıta keteıik, elimizde mashına óndirisi 22 paıyz ósti.
