Qazaqstanda aýyl sharýashylyǵy sanaǵynyń oflaın kezeńi bastalady

ASTANA. KAZINFORM — 20 qyrkúıekten bastap elimizde aýyl sharýashylyǵy sanaǵynyń ekinshi kezeńi ótedi, dep habarlaıdy Ulttyq statıstıka bıýrosynyń baspasóz qyzmeti.

Intervıýerler barlyq eldi mekende úı-úıdi aralap, derekter jınaıdy. Jalpy sany shamamen 1,2 mln úı sharýashylyǵyn qamtý josparlanǵan.

Aýyl sharýashylyǵy sanaǵy elimizde ekinshi ret ótkizilip otyr. Onyń maqsaty — agrarlyq salanyń jaǵdaıy týraly tolyq málimet alý, ásirese aýyldar, kentter men aýyldyq okrýgter deńgeıinde. Saýalnama paraǵy 22 suraqtan turady. Onda mal men qustyń bolýy, jer resýrstaryn paıdalaný, baqsha egý, tyńaıtqysh qoldaný jáne basqa da málimetter suralady.

— Biz sanaqtyń onlaın kezeńin aıaqtadyq, ol kezde aýyl sharýashylyǵy qurylymdary men úı sharýashylyqtarynyń saýalnamany sanaq.gov.kz saıtynda toltyrý múmkindigi boldy. Ol kezeńge 600 myńnan astam respondent qatysty. Endi aýqymdy kezeń bastaldy: ıntervıýerler úılerdi aralap, derekterdi planshet arqyly jınaıdy. Barshańyzdy sharaǵa belsendi qatysýǵa jáne ózekti aqparat berýge shaqyramyz. Suraqtar qarapaıym ári tek aýyl sharýashylyǵy qyzmetine qatysty bolady. Barlyq jaýap statıstıkalyq maqsatta paıdalanylady jáne úshinshi tulǵalarǵa berilmeıdi, — dedi bıýro basshysy Maqsat Turlybaev.

Úı-úıdi aralaý jumysyna 2,5 myńnan astam ıntervıýer jumyldyrylady. Olar aıryqsha kók tústi formada — jılet pen beısbolkada bolady, beıdjde jeke basyn rastaýǵa arnalǵan QR-kod ornalasady. Eger úı ıeleri úıinde bolmasa, ıntervıýer baılanys nómiri kórsetilgen habarlandyrý qaldyrady.

Ulttyq statıstıka bıýrosy aqparattyń qaýipsizdigi men qupııa saqtalýyna kepildik beredi. Barlyq jaýap zańmen qorǵalady, al derekter tek jalpylanǵan túrde qoldanylady. Suraqtar týyndaǵan jaǵdaıda Bıýronyń baılanys ortalyǵyna 1446 nómiri arqyly habarlasýǵa bolady (jumys ýaqyty 9.00–21.00, qońyraý shalý — tegin).

1 tamyzda bastalǵan Aýyl sharýashylyǵy sanaǵy, 20 qazanǵa deıin jalǵasady. Jınalǵan derekter salaǵa qatysty málimetterdi jańartýǵa jáne aýyl sharýashylyǵyn damytýǵa arnalǵan sheshimder qabyldaýǵa negiz bolady.

Budan buryn Batys Qazaqstanda 1 myńnan astam aýyl sharýashylyǵy kásiporny sanaqtan ótetini habarlandy.