Qazaqstanda aýyl sharýashylyǵy sanaǵynyń bastalýyna týra bir aı qaldy

ASTANA. KAZINFORM - Bıylǵy 1 tamyzda Qazaqstanda Ulttyq aýyl sharýashylyǵy sanaǵy bastalady. Bul aýqymdy statıstıkalyq shara respýblıkanyń barlyq óńirin qamtyp, aýyl sharýashylyǵynyń jaı-kúıi týraly ózekti derekterdiń mańyzdy kózine aınalady.

Sanaq eki kezeńde ótedi jáne 2025 jyldyń 20 qazanyna deıin jalǵasady:

Onlaın kezeń – 1-31 tamyz aralyǵynda: ósimdik jáne mal sharýashylyǵymen, balyq ósirýmen aınalysatyn zańdy tulǵalar, jeke kásipkerler, sharýa jáne fermer qojalyqtary, sondaı-aq úı sharýashylyqtary qatysýy tıis. Saýalnama sanaq.gov.kz saıtynda ótedi.

Oflaın-kezeń – 20 qyrkúıek-20 qazan aralyǵynda: ıntervıýerler onlaın-saýalnamadan ótip úlgermegen, baý-baqshasy bar nemese mal ustaıtyn úılerdi aralaıdy.

- Biz barlyq aýyl sharýashylyǵy taýaryn óndirýshilerge, fermerlerge jáne aýyl turǵyndaryna úndeý joldaımyz. Aýyl sharýashylyǵy sanaǵyna qatysý – jaı ǵana formaldy rásim emes, bul elimizdiń agrarlyq salasynyń erteńine qosqan úles. Tek tolyq ári naqty derekter ǵana memlekettik qoldaýdy durys baǵyttap, aýyldyń ınfraqurylymyn damytýǵa jáne aýyl sharýashylyǵy men azyq-túlik saıasatyn tıimdi júrgizýge múmkindik beredi, – dep atap ótti Ulttyq statıstıka bıýrosynyń basshysy Maqsat Turlybaev.

Sanaqta 2 mln jýyq úı sharýashylyǵyn jáne 300 myńnan astam aýyl sharýashylyǵy taýaryn óndirýshilerdi qamtý josparlanǵan. Búkil el boıynsha saýalnama júrgizý úshin 3500-den astam ıntervıýer tartylady.

Azamattarǵa yńǵaıly bolý úshin aýyldyq ákimdikter men aýdandyq statıstıka bólimderinde ınternetke qosylǵan ózine-ózi qyzmet kórsetý aımaqtary bolady. Sondaı-aq azamattar 1446 baılanys ortalyǵyna habarlasyp keńes ala alady.

- Agrarlyq salanyń barlyq qatysýshylaryn sanaqtan ótip, aýyl sharýashylyǵyn damytýǵa úles qosýǵa shaqyramyz, - dep jazdy Statbıýrodan.

Aıta keteıik, Qyzylordada aýyl sharýashylyǵy sanaǵyna jumyssyzdar men stýdentter tartylady.