Qazaqstanda aýyl sharýashylyǵy kásiporyndaryna 5 paıyzben jeńildetilgen nesıe beriledi
ASTANA. KAZINFORM – Qazaqstanda azyq-túlik óndirýshiler, aýyl sharýashylyǵy ónimderin qaıta óńdeıtin kásiporyndar men mal sharýashylyǵy keshenderi «Agrobıznes» baǵdarlamasy arqyly aınalym qarajatyn tolyqtyrý úshin jyldyq 5 paıyzben jeńildetilgen nesıe ala alady, dep habarlaıdy Aýyl sharýashylyǵy mınıstrligi.
Baǵdarlama aýyl sharýashylyǵy kásiporyndaryn qoljetimdi qarjylandyrýmen qamtamasyz etýge jáne óndiristiń úzdiksiz jumys isteýine baǵyttalǵan.
Jeńildetilgen nesıeniń jyldyq syıaqy mólsherlemesi 5 paıyzdy quraıdy. Jyldyq tıimdi syıaqy mólsherlemesi de 5 paıyzdan bastalady.
Bir transh boıynsha qarjylandyrý merzimi 12 aıǵa deıin, al kredıttik jeliniń qoldanylý merzimi 36 aıǵa deıin belgilengen.
Nesıeni óteý kestesi qaryz alýshynyń qyzmet ereksheligi men bıznes-josparyna qaraı jeke jasalady.
– Mal bordaqylaýmen aınalysatyn sharýashylyqtar úshin nesıe somasynyń keminde 70%-y keıinnen bordaqylaý maqsatynda mal satyp alýǵa baǵyttalýy tıis, – dep túsindirdi mınıstrlik.
Al etti jáne sútti baǵyttaǵy asyl tuqymdy mal ósiretin sharýashylyqtar nesıe qarajatyn jemshóp pen jemshóp qospalaryn, janar-jaǵarmaı materıaldaryn, veterınarııalyq preparattardy satyp alýǵa jumsaı alady.
Sondaı-aq qarjyny jemshóp daıyndaý jáne taratý tehnıkasy men jabdyqtaryna qajetti qosalqy bólshekter alýǵa, qyzmetkerlerdiń eńbekaqysyn tóleýge paıdalanýǵa ruqsat etiledi.
Mınıstrlik málimetinshe, baǵdarlama qaıta óńdeý kásiporyndary men mal sharýashylyǵy keshenderiniń aınalym qarajatyna degen qajettiligin óteýge, óndiristik protsesterdiń turaqtylyǵyn saqtaýǵa jáne salany damytýǵa múmkindik beredi.
Aıta keteıik, buǵan deıin Qazaqstanda mal sharýashylyǵyn memlekettik qoldaý júıesi ózgerip, fermerlerdi sýbsıdııalaýdan jeńildetilgen nesıeleýge kezeń-kezeńimen kóshirý bastalǵany habarlanǵan edi. Aýyl sharýashylyǵy kásiporyndaryna jyldyq 5%-ben nesıe alý múmkindigi qarastyrylǵan.
