Qazaqstanda Aýǵanstan jastaryna bólinetin bilim granty qysqarady - Darıǵa Nazarbaeva
ASTANA. QazAqparat - Qazaqstan Aýǵanstan jastaryna bólinetin bilim granttaryn qysqartady, dep habarlaıdy QazAqparat tilshisi.
Bul týraly QR Parlamenti Senatynyń depýtaty Darıǵa Nazarbaeva Astanada ótip jatqan «Aýǵanstandaǵy áıelderdiń quqyqtary men múmkindikterin keńeıtý» óńirlik konferentsııasynda málimdedi.
«Aýǵanstan jastaryna arnalǵan 5 jyldyq bilim berý baǵdarlamasy aıasynda myńnan astam aýǵan jastary Qazaqstanda oqydy. Jyl saıyn 100 adam elimizdegi joǵary oqý oryndaryna túsip otyrdy. Qazir bul baǵdarlama óz máresine jetti jáne baǵdarlamany 30 aýǵanstandyqty oqytýǵa deıin qysqartamyz», - dedi Darıǵa Nazarbaeva jýrnalısterge bergen suhbatynda.
Senatordyń aıtýynsha, bul bilim alǵysy keletin aýǵan jastarynyń sanyna esh áser etpeýi tıis, sebebi olar Qazaqstanda ǵana emes, Ózbekstan, Japonııa, Eýropada bilim ala alady.
«Búgingi konferentsııada ózbekstandyq áriptesterimiz óz elderinde aýǵan jastaryn oqytyp jatqanyn aıtty. Japonııa da bilim berý jobalarynda Aýǵanstanǵa úlken kómek berip otyr. Eýropalyq odaq bilim berý grantynyń alǵashqy kezeńine 2 mln eýro bólýge daıyn. ıAǵnı bul jumys jalǵasa beredi», - dedi Darıǵa Nazarbaeva.
Sonymen birge, D. Nazarbaeva Aýǵanstan jastaryna bólinetin bilim granttarynyń 50 protsentin qyzdarǵa bólýdi usyndy.
«Búgingi sharany áıelderge arnap otyrǵanymyz tegin emes. Áıel ómirge bala ákeledi jáne oǵan eń alǵashqy tárbıe berip, minezi men mentalıtetin qalyptastyrady. Sondyqtan, áıel bilimdi bolýy kerek. Bilimdi áıel balasyna óz mahabbatyn, jylýy men meıirimin berýmen birge, durys dúnıetanymyn qalyptastyrady. Erlerdiń áıelderge degen qarym-qatynasy durys qalyptasady. ıAǵnı, barlyǵy otbasynan bastalady», - dedi senator.
