Qazaqstanda áýedegi tranzıttik jolaýshylar tasymaly sońǵy 7 jylda 5 esege artty
ASTANA. QazAqparat - Astanada ótip jatqan H «TransEýrazııa-2017» kólik-tranzıttik áleýet jónindegi halyqaralyq konferentsııada QR Investıtsııalar jáne damý mınıstri Jeńis Qasymbek Qazaqstanda áýedegi tranzıttik jolaýshylar tasymaly sońǵy 7 jylda 5 esege artqanyn málim etti, dep habarlaıdy «QazAqparat»HAA tilshisi.
«Qazaqstanda azamattyq avıatsııa boıynsha trendterdiń damýy baıqalady. Elimizde azamattyq avıatsııa salasy ótken jylmen salystyrǵanda 10 paıyzǵa ósti. Buǵan qosa ushaqtardyń geografııalyq aýmaǵy da keńeıip keledi. Ushaqpen ushatyn tranzıttik jolaýshylardy Qazaqstan arqyly arttyrý biz úshin óte mańyzdy faktor. Qazaqstan tranzıttik jolaýshylar aǵynyn sońǵy 7 jylda 5 esege arttyrdy. Sonymen birge, jyl saıyn bul kórsetkishtiń artyp kele jatqanyn baıqap otyrmyz. Olardyń negizgisi - Eýropadan Ońtústik-Shyǵys Azııaǵa, Qytaıǵa Almaty arqyly ushady. Biz 37 memleketpen úkimetaralyq kelisimge qol jetkizdik. Búgingi kúni 96 elge halyqaralyq baǵdar boıynsha ushaq ushady. Biz osy trendti saqtaýdy kózdep otyrmyz», - deıdi mınıstr.
Jeńis Qasymbektiń aıtýyna qaraǵanda, bıyl Astanadaǵy áýejaıǵa pılottyq nusqa retinde «Ashyq aspan» jobasyn bastalyp, sheteldik jolaýshylarǵa jeńildikter kórsetilgenin atap ótti.
«QHR-dan keletin tranzıttik jolaýshylar úshin 72 saǵattyq vızasyz rejımdi engizdik. Búgingi tańda Úndistannan keletin jolaýshylar úshin osy múmkinshilikti berip otyrmyz. Qazaqstanda jalpy kóliktik qurylymnyń damýyna avıatsııalyq tranzıt zor úlesin qosaryna senimdemin», - deıdi Jeńis Qasymbek.
Eske sala ketsek, búgin Astanada H «TransEýrazııa-2017» kólik-tranzıttik áleýet jónindegi halyqaralyq konferentsııasy bastaldy. Oǵan Latvııa, Lıtva, Túrkııa, Ázerbaıjan, Reseı, Belarýs elderinen 300-ge jýyq delegat qatysýda.
