Qazaqstanda áýe tasymalynyń kólemi artty
ASTANA. QazAqparat - Qazaqstan aýmaǵynda ushaqtardyń ushý kórsetkishi 2017 jyldyń qańtar-qyrkúıek aılarynda ótken jylmen salystyrǵanda 9,7 paıyzǵa artyp, 183 myńǵa jetken, dep habarlaıdy «QazAqparat» HAA tilshisi.
«2017 jyldyń 9 aıy ishinde Qazaqstanda ushaqtar 183 myń márte áýege kóterilip, ótken jyldyń sáıkes kezeńimen salystyrǵanda bul kórsetkish 9,7 paıyzǵa artty. Áýe keńistigi arqyly tranzıttik sapardyń ósimi 5,2 paıyzǵa ósti. Áýe tasymalynyń bıylǵy jyly artýyn halyqaralyq «EKSPO-2017» kórmesimen jáne ózge de halyqaralyq forýmdardarmen, sharalarmen baılanystyrýǵa bolady», - deıdi «Qazaeronavıgatsııa» RMK bas dırektorynyń orynbasary Faat Bogdashkın.
Sonymen qatar, ol Astanada halyqaralyq qarjy ortalyǵy qurylyp, Qazaqstannyń qarjylyq ınfraqurylymyna aınalatyndyqtan, bul kórsetkishtiń áli de arttatynyna senim bildirdi.
«Qazaqstan aýmaǵynda jalpy uzyndyǵy 84 myń shaqyrymǵa jetetin 92 áýe tas joly, ózge de memleketterdiń shekarasy boıynsha 73 áýe dálizi bar. 2016 jyly biz 230 myń márte áýege kóterilip, qyzmet kórsettik. Táýlik saıyn 600 áýe kemesi qyzmet kórsetedi. Trafıkterdiń negizgi úlesin joǵarǵy áýe keńistigindegi tranzıtti ushaq saparlary quraıdy. Olardyń úlesi - 70 paıyz», - deıdi bas dırektordyń orynbasary.
Faat Bogdashkınniń aıtýynsha, sheteldik avıkompanııalardyń Qazaqstannan aýmaǵynan ótetin áýe tranzıttik tasymalynyń 80 protsenti Eýropany Ońtústik-Shyǵys Azııamen, Ońtústik Azııany Taıaý Shyǵyspen jáne Eýropamen baılanystyrady.
«Qazaqstan arqyly perspektıti tranzıttik aǵyndardyń biri AQSh pen Kanada, BAÁ, Pákistan, Taıland pen Sıngapýr elderinen transqurlyqty ushýlar bolyp tabylady. Bul kúnderi atalǵan baǵdarlar jumys istep tur», - deıdi ol.
