Qazaqstanda áýe reısi keshikkende salynatyn aıyppuldyń kólemi artýy múmkin

NUR-SULTAN. QazAqparat – Elimizde áýe reısteriniń keshigý faktilerine qatysty tergeý jalǵasyp jatyr. Bul jaıynda Azamattyq avıatsııa komıtetinen málim etti, dep habarlaıdy QazAqparat tilshisi.

«Qazaqstan Respýblıkasynyń Indýstrııa jáne ınfraqurylymdyq damý mınıstri Q.Óskenbaevtyń tapsyrmasymen Azamattyq avıatsııa komıteti reısterdiń keshigýine baılanysty tergeý jumysyn jalǵastyryp jatyr. Atap aıtqanda, tergeý bastalǵannan beri «Eır Astana» áýe kompanııasy tobyna qatysty Ákimshilik quqyq buzý týraly kodekstiń 567-baby 2-tarmaǵy boıynsha reısterdiń keshigýine baılanysty jolaýshylar quqyǵynyń buzylýyna oraı árqaısysy bir myń AEK-ti quraıtyn 4 hattama jasaldy», - dep atap ótti vedomstvodan.

Komıtet qazirgi ýaqytta óz tarapynan tergeý jalǵasyp jatqanyn, áýe reısteriniń keshigýine qatysty jańa faktiler anyqtalǵan jaǵdaıda tasymaldaýshy qoldanystaǵy zańnamaǵa sáıkes jaýapkershilikke tartylatyndyǵyn atap ótedi.

«Buǵan qosa, reıster keshikken jaǵdaıda áýe kompanııalarynyń jaýapkershiligin kúsheıtý maqsatynda qoldanystaǵy zańnamaǵa tıisti túzetýler qarastyrylyp jatyr. Atap aıtqanda, atalǵan jumys aıasynda reıs keshikken jaǵdaıda jolaýshylarǵa tólenetin aıyppul mólsherin arttyrý máselesi qaralý ústinde», - dedi komıtetten.