Qazaqstanda áýe qozǵalysyn basqarý tártibi jetildiriledi
ASTANA. KAZINFORM — Qazaqstanda áýe qozǵalysyn uıymdastyrý men oǵan qyzmet kórsetý tártibine ózgerister engizý josparlanyp otyr. Kólik mınıstrligi tıisti nusqaýlyqqa túzetýler ázirledi.
Jańa ózgerister áýe qozǵalysyn basqarý qyzmetkerleriniń jumys ýaqyty men demalysyn retteýge qatysty talaptardy jetildirýdi kózdeıdi.
Sondaı-aq áýe kemesin tómendetý jáne qonýǵa baǵyttaý kezinde dıspetcherlik qyzmet kórsetý tártibin naqtylaý usynylǵan. Buǵan qosa, áýe kemesimen baılanys úzilgen nemese qaıta qalpyna kelgen jaǵdaıda qoldanylatyn rásimder de rettelmek.
Qujatta áýe qozǵalysyn baqylaý júıelerin paıdalaný, áýe kemeleriniń ornalasqan jeri týraly málimetterdi berý jáne áýe qozǵalysyna qyzmet kórsetetin bólimsheler arasyndaǵy úılestirý talaptaryn naqtylaý qarastyrylǵan.
Budan bólek, áýe kemeleri arasyndaǵy qaýipsiz araqashyqtyqty saqtaý jáne áýeaılaqtaǵy dıspetcherlik qyzmet kórsetý talaptary jetildiriledi.
Áýe qozǵalysynyń aǵynyn uıymdastyrý, áýe qozǵalysyna qyzmet kórsetý baǵyttaryn belgileý jáne olardyń tańbalaný tártibine de ózgerister engizý usynylǵan. Qujatta birqatar termın naqtylanyp, redaktsııalyq túzetýler de qamtylǵan.
Tıisti qujat «Ashyq NQA» portalynda jarııa talqylaýǵa shyǵaryldy. Talqylaý 25 qarashaǵa deıin jalǵasady. Buǵan deıin Astana áýejaıy 20 jylǵa jýyq ózgermegen tarıfti qaıta qaraýdy usynǵany týraly jazǵan edik.