Qazaqstanda Áýe qorǵanysy kúshteriniń bólimshelerine arnalǵan jańa ǵımarattar salynyp jatyr (FOTO)

ASTANA. QazAqparat - Jeke quramnyń jaýyngerlik daǵdysynyń deńgeıin, qarý-jaraq pen áskerı tehnıkanyń jaı-kúıin, áskerı qyzmetshilerdiń materıaldyq-tehnıkalyq qamtamasyz etilýi men moraldyq-psıhologııalyq jaı-kúıin tekserý úshin Áýe qorǵanysy kúshteriniń bas qolbasshysy avıatsııa general-maıory Nurlan Ormanbetovtiń basshylyq etýimen áskerı bólimderdiń keshendi tekserilýi ótkizildi, dep habarlady QR Qorǵanys mınıstrliginiń baspasóz qyzmetinen.

Qazaqstan Respýblıkasy Qarýly Kúshteriniń ókilderi Jezqazǵan qalasyndaǵy radıolokatsııalyq rotaǵa arnalǵan jańa keshendi ǵımarattyń salynýy barysyn tekserdi.

«Áskerı bólimder men garnızondardyń kúrdeli jáne aǵymdaǵy jóndelýi josparyna sáıkes, búgingi tańda jańa keshendi ǵımarattyń qurylysy aıaqtalyp ta qaldy. Jańa ǵımaratqa shtabtyń, ashananyń, rejimdi obektilerdiń, medıtsınalyq pýnkti men kazarmanyń orynjaılary kiretin bolady. Sondaı-aq, qaraýyldyq úı-jaı men baqylaý-ótkizý pýnkti turǵyzylyp, qorshaý jasalady. Keshendi ǵımaratty paıdalanýǵa berý 2016 jylǵy mamyr aıynyń sońynda josparlanyp otyr», - dep «Áskerı qurylys» AQ-tyń ókili Danııa Mamatov atap ótti.

Keshendi komıssııa Jezqazǵan, Qyzylorda, Taraz, Jetigen jáne Balqash qalalarynda ornalasqan áskerı bólimderge barǵanyn aıta keteıik.

Odan basqa, áýe qozǵalysyn basqarý bas ortalyǵy men Qyzylorda shaharyndaǵy jekelegen radıolokatsııalyq rota tekserildi.