Qazaqstanda Áýe qorǵanysy kúshteriniń basqarý júıesi alǵash ret synaqtan ótti
QARAǴANDY. KAZINFORM – Qaraǵandy oblysyndaǵy «Saryshaǵan» polıgonynda Áýe qorǵanysy kúshterin tsıfrlandyrýdyń mańyzdy kezeńine aınalǵan «Jaýyngerlik dostastyq-2025» taktıkalyq oqý-jattyǵýynyń belsendi fazasy ótti.
Alǵash ret avtomattandyrylǵan basqarý júıesi synaqtan ótkizilip, ol jaýyngerlik jaǵdaıǵa barynsha jaqyndatylǵan ortada tıimdiligin kórsetti.
Oqý-jattyǵý barysyn Qorǵanys mınıstriniń orynbasary – Áýe qorǵanysy kúshteriniń bas qolbasshysy general-maıor Qaırat Sadyqov jáne Qorǵanys mınıstriniń tsıfrlandyrý jónindegi orynbasary Darhan Ahmedıev baqylady.
Manevrlerge áýe shabýylyna qarsy qorǵanys bólimsheleri men shartty qarsylas rólin atqarǵan Áýe kúshteriniń maıdandyq avıatsııa ekıpajdary qatysty. Áýe nysandary anyqtalǵan sátte áýe shabýylyna qarsy qorǵanys eseptoptary jappaı soqqylarǵa toıtarys berý úshin habardar etý jáne soqqy berý quraldaryn qoldaný algorıtmderin pysyqtady.
– Taktıkalyq oqý-jattyǵý Áýe qorǵanysy kúshteriniń damýyna mańyzdy kezeń boldy. Biz alǵash ret avtomattandyrylǵan basqarý júıesin qoldandyq, nátıjeleri kútkennen de asyp tústi. Tsıfrlyq sheshimder aqparat almasý jyldamdyǵyn arttyryp, úılesimdilikti naqtylaı tústi. Bul áskerdi basqarý júıesin jetildirýge yqpal etti, - dep atap ótti áýe shabýylyna qarsy qorǵanys áskeri mamany Ádil Súbebaev.
Oqý-jattyǵý tsıfrlyq sheshimderdi jaýyngerlik tájirıbege engizý bólimshelerdiń jaýyngerlik qabiletin arttyrýǵa jáne el áýe keńistiginiń qaýipsizdigin nyǵaıtýǵa jańa múmkindikter ashatynyn rastady.
Buǵan deıin Aqtaýda Qazaqstan Áskerı-teńiz kúshteriniń jedel-taktıkalyq oqý-jattyǵýy aıaqtalǵanyn jazǵan edik.