Qazaqstanda áýe kóliginiń jolaýshylary kókte uıaly telefonmen sóılesip, ınternetti paıdalana alatyn bolady
ASTANA. 13 qyrkúıek. QazAqparat - Qazaqstannyń áýejaılary jolaýshylarǵa qyzmet kórsetýdiń halyqarlyq standarttaryna kóshedi.
Atap aıtqanda, Kólik jáne kommýnıkatsııalar mınıstrligi jolaýshylarǵa qyzmet kórsetý sapasynyń standarttaryn daıyndady. Atalǵan standarttar bekitilgennen keıin elimizdiń áýejaılary men áýe kompanııalary jolaýshylarǵa qyzmet kórsetý boıynsha óz jumysyn jańa erejelerge saı atqaratyn bolady.
Mınıstrlik baspasóz qyzmetiniń habarlaýynsha, jańa standarttarǵa sáıkes áýejaılar ótkizý qabiletine baılanysty sanattarǵa bólinedi. Al, aerobeketterde kórsetiletin qyzmetter «mindetti» jáne «qosymsha» sanattarǵa bólinedi. Mysaly, ana men bala bólmesi, medıtsınalyq pýnkt, valıýta aıyrbastaý pýnkti, júk saqtaý qoımasy, taksı dıspetcherlik keńsesi, dárihana, dinı ádet-ǵuryptar bólmesi, tabylǵan zattar bıýrosy, baspa ónimderin satý dúńgirshekteri, qoǵamdyq tamaqtaný jerleriniń bolýy mindetti qyzmetterdiń qataryna jatqyzylady. Qosymsha qyzmet túrlerine, ortasha áýejaılarda kútý aımaǵynda balalarǵa arnalǵan oıyn bólmeleri, múmkindikteri shekteýli jandarǵa arnalǵan kútý bólmeleri, bıznes-ortalyqtar, qonaqjaı, poshta jáne kýrer qyzmetteri, t.b. engiziledi.
Daıyndalǵan standarttarda jolaýshylarǵa qyzmet kórsetý sapasynyń naqty krıterııleri men baǵalaý parametrleri anyq jazylǵan. Mysaly, jolaýshy aınalymy jylyna 1 mıllıon adamdy quraıtyn áýejaıda kólik turaqtary 558-den kem bolýy kerek. Avtoturaqtardan aerobeketke barýǵa ketetin ýaqyt 5 mınýttan aspaýy tıis. Kútý aımaǵynda arnaıy adam shoǵyrlanatyn jer bolmaǵan jaǵdaıda jolaýshylar men shyǵaryp salýshylar úshin otyratyn oryndar 20 paıyzdan kem bolmaýy tıis. Al, eger adam kóp jınalatyn jer bolsa, onda jolaýshylardyń 60 paıyzy otyrý múmkindigine ıe bolýy tıis. Saparlar kestege sáıkes oryndalyp jatqan jaǵdaıda jolaýshylardyń tólqujat jáne vıza baqylaýlarynan ótý ýaqyty ushyp kelgende 15 mınýttan, ushyp bara jatqanda 10 mınýttan aspaýy tıis. Jolaýshylar ushyp kelgende áýejaıda olarǵa qyzmet kórsetý ýaqyty 45 mınýttan, ushyp bara jatqanda - 60 mınýttan aspaýy tıis.
Sonymen qatar, áýe kemeleriniń ishinde jolaýshylarǵa kórsetiletin mindetti jáne usyný qyzmetterdiń tizimin anyqtaıtyn talaptar bekitildi. Mindetti qyzmetterdiń qataryna úsh tilde (qazaq, orys jáne aǵylshyn) aqparattyq-anyqtamalyq qyzmet kórsetý, ár jolaýshyǵa jeke qyzmet kórsetý, naýqas, múgedek, qarttar jáne balaly jolaýshylarǵa erekshe kóńil bólý, sábılerge arnalǵan aspa-besikteriniń bolýy, alǵashqy dárigerlik kómektiń kórsetilýi, bort tamaǵynyń berilýi, merzimdi baspasóz quraldarynyń usynylýy jatady. Usyný qyzmetterdiń qataryna kıno kórsetilimi, jer ústi abonentimen mobıldi baılanystyń usynylýy, jelisiz Internettiń bolýy jatady.
