Lazer nemese dron arqyly ushqyshtarǵa kedergi keltirý endi qylmys bolyp sanalady

ASTANA. KAZINFORM – 14 qyrkúıekten bastap Qazaqstanda áýe kemelerin basqarýǵa kedergi keltirý, onyń ishinde lazer sáýlesi arqyly ushqyshtardyń ýaqytsha kórý qabiletine aıyrylýyna áreket jasaý nemese pılotsyz ushý apparattaryn áýe kemesine baǵyttaý endi qylmystyq jaýapkershilik bolyp esepteledi.

Kólik mınıstrligi málimetinshe, bul ózgerister jolaýshylar men ekıpajdyń ómiri men densaýlyǵyna qaýip tóndiretin jaǵdaılardyń aldyn alý úshin engizilip otyr.

Endi joǵaryda atalǵan is-áreket úshin bas bostandyǵynan aıyrý jazasy qarastyryldy. Mundaı normalar kóptegen elderde qoldanylady. Máselen, Germanııada 10 jylǵa deıin, Ózbekstanda bir jylǵa deıin bas bostandyǵynan aıyrý jazasy bar. Sondaı-aq Kanada, AQSh, Aýstralııa jáne Jańa Zelandııada da qylmystyq jaýapkershilik qarastyrylǵan.

Lazerlik sáýleler ushqyshty ýaqytsha kórý qabiletinen aıyryp, áýe qaýipsizdigine tikeleı qaýip-qater tóndiredi. Ásirese ushý men qoný sátinde mundaı áreketter asa qaýipti. Atalǵan quqyqbuzýshylyqty tergeý jáne kinálilerdi jaýapqa tartý ishki ister organdarynyń quzyretine jatady.

Anyqtama retinde: «352-1-bap. Áýe kemesin basqarýǵa bógeýil jasaý Lazerlik qurylǵylardy nemese pılotsyz ushý apparattaryn áýe kemesine baǵyttaý arqyly áýe kemesin basqarýǵa bógeýil jasaý – 200 AEK deıingi mólsherde aıyppul salýǵa ne sol mólsherde túzeý jumystaryna, ne 200 saǵatqa deıingi merzimge qoǵamdyq jumystarǵa tartýǵa, ne 50 táýlikke deıingi merzimge qamaýǵa alýǵa jazalanady.

Abaısyzda adam densaýlyǵyna aýyr nemese aýyrlyǵy ortasha zııan keltirýge ne iri zalal keltirýge alyp kelgen dál sol is-áreket – 3000 AEK deıingi mólsherde aıyppul salýǵa ne sol mólsherde túzeý jumystaryna, ne 1000 saǵatqa deıingi merzimge qoǵamdyq jumystarǵa tartýǵa, ne 4 jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady.

Osy baptyń birinshi bóliginde kózdelgen, abaısyzda adamnyń ólimine alyp kelgen is-áreket – 3 jyldan 8 jylǵa deıingi merzimge bas bostandyǵynan aıyrýǵa jazalanady.

Osy baptyń birinshi bóliginde kózdelgen, abaısyzda eki nemese odan da kóp adamnyń ólimine alyp kelgen is-áreket – 6 jyldan 10 jylǵa deıingi merzimge bas bostandyǵynan aıyrýǵa jazalanady.

Aıta keteıik, áýejaıda qol júgine qatysty jańa erejeler engizildi.