Qazaqstanda áýe baǵyttaryn sýbsıdııalaý qaǵıdalary ózgertildi
ASTANA. KAZINFORM — QR Úkimeti áýe baǵyttaryn sýbsıdııalaý qaǵıdalaryna tolyqtyrýlar engizdi.
Jańa erejelerge sáıkes, áýe baǵyttaryn sýbsıdııalaý — memlekettik qoldaý sharasy. Sondaı-aq, kásipkerlik jónindegi ýákiletti organ daıyndaıtyn jeke kásipkerlikti memlekettik qoldaý sharalarynyń tizilimine engizý arqyly júzege asyrylady.
Aldymen, bıýdjettiń atqarylýy jónindegi ortalyq ýákiletti organ zańdy tulǵany aıqyndaıdy. Ol tizilimdi júrgizýge tehnıkalyq súıemeldeý úshin jaýapty bolady. Sonymen birge, atalǵan zańdy tulǵanyń jalǵyz aktsıoneri memleket bolady.
Memlekettik qoldaý sharalaryn paıdalaný jáne olardy alýshylardyń qyzmeti eki deńgeıli tsıfrlyq júıe arqyly monıtorıngten ótedi:
• Birinshi deńgeı — ekinshi deńgeıdegi júıelermen ıntegratsııalanǵan tirkeý júıesi. Onyń quramynda jeke kásipkerlikti memlekettik qoldaý sharalaryn alýshylar ótinimderiniń etalondyq elektrondyq tizilimi bolady. Bul deńgeıde memlekettik qoldaý sharalaryn alýshynyń bıýdjettiń atqarylýy jónindegi ýákiletti organ monıtorıng júrgizý qaǵıdalary aıasynda belgileıtin negizgi talaptarǵa sáıkestigi formattyq-logıkalyq baqylaýdyń qorytyndysy boıynsha anyqtalady.
• Ekinshi deńgeı — memlekettik nemese memlekettik emes salalyq tsıfrlyq júıeler. Bul júıeler arqyly jeke kásipkerlikti memlekettik qoldaý sharalaryn alýshylardan ótinimder qabyldanyp, olar formattyq-logıkalyq baqylaý arqyly óńdeledi jáne óńdelgen ótinimder birinshi deńgeıdegi júıege jiberiledi.
Sonymen qatar, ekinshi deńgeıdegi tsıfrlyq júıeler memlekettik qoldaý sharalaryn alýshylardan zańmen qorǵalatyn qupııa málimetterdi paıdalanýǵa, sondaı-aq olardyń derbes derekterin tirkeýshige jınaýǵa, óńdeýge, saqtaýǵa, júkteýge jáne paıdalanýǵa kelisim alýdy qamtamasyz etedi.
Jeke kásipkerlikti memlekettik qoldaý sharalaryn eki deńgeıli júıe arqyly júrgizilgen monıtorıng nátıjeleri kásipkerlik jónindegi ýákiletti organǵa usynylady.
Memlekettik qoldaý sharalaryn tıisti tizilimge engizbeı usynýǵa jol berilmeıdi.
Qaýly 5 tamyzdan bastap qoldanysqa engizildi.
Aıta keteıik, buǵan deıin elimizdiń avıatsııalyq júıesi qalaı qalyptasyp jatqanyn jazǵanbyz.
