Qazaqstanda aýasy qatty lastanǵan qalalar belgili boldy

ASTANA. QazAqparat – Elimizdegi 4 qalanyń atmosferalyq aýasy joǵary deńgeıde lastanǵan. Bul týraly QazAqparat Ranking.kz portalyna silteme jasap habarlaıdy.

Ranking.kz málimetinshe, sońǵy 5 jylda atmosferalyq aýasy joǵary deńgeıde lastanǵan qalalar - Astana, Qaraǵandy, Jezqazǵan jáne Temirtaý.

Máselen, Astanada aýanyń lastanýyna sebep bolǵan negizgi faktorlar – jylý energetıka kásiporyndarynyń shyǵaryndylary.

Sonymen qatar, elorda aýasynyń sapasyna kólikter de teris áser etip otyr.

Qaraǵandydaǵy jaǵdaı da Astanaǵa uqsas. Munda qys mezgilinde jylytý kompanııalary men jeke sektordyń shyǵaryndylary aýany lastap jatyr.

Buǵan qosa, atalǵan shahar aýmaǵynda iri ónerkásiptik kásiporyndar ornalasqan.

Al Temirtaýda jyldyń kez kelgen mezgilinde aýa lastana beredi. Oǵan qaladaǵy ónerkásiptik jáne metallýrgııalyq kásiporyndardan bólinetin zııandy qaldyqtar sebep.

Bul baǵyttaǵy ekologııalyq máselelerdi sheshý úshin ınvestıtsııa qajet ekeni túsinikti.

Ulttyq statıstıka bıýrosynyń dereginshe, Qazaqstanda 2018-2021 jyldar aralyǵynda qorshaǵan ortany qorǵaýǵa baǵyttalǵan ınvestıtsııa kólemi ósken. Alaıda, byltyr qarajat kólemi aıtarlyqtaı qysqarǵan.

Atap aıtqanda, ótken jyly qańtar-jeltoqsan aralyǵynda qorshaǵan ortany qorǵaýǵa baǵyttalǵan ınvestıtsııa birden 50,8%-ǵa tómendep, 80,6 mlrd teńge boldy.

Jalpy alǵanda, 2018-2022 jyldar aralyǵynda ekologııa máselesin sheshýge bólingen ınvestıtsııa 600 mlrd teńgege jetken.

Al munyń aldyndaǵy bes jyldyqta, ıaǵnı 2013-2018 jyldary qorshaǵan ortany qorǵaýǵa baǵyttalǵan qarajat 235,9 mlrd teńge bolǵan edi.