Qazaqstanda aýany lastaıtyn kólikterge aıyppul artady
Bul Kodeks «lastaýshy tóleıdi» prıntsıpine sáıkes keledi. QR Ákimshilik quqyq buzýshylyq týraly kodeksine (334 bap) engizilgen ózgeristerge sáıkes, shyǵaryndylardaǵy lastaýshy zattardyń mólsheri belgilengen normatıvterden assa, jeke kólik ıesi 10 AEK, zańdy tulǵalar 100 aılyq eseptik kórsetkish mólsherinde aıyppul tóleıdi. Al buzýshylyq bir jyl ishinde qaıtalansa - jeke tulǵalarǵa 20, zańdy tulǵalarǵa 200 AEK aıyppul salynady. Jańa norma shilde aıynda kúshine enedi. Al ázirge qoldanystaǵy zańnamaǵa sáıkes jeke tulǵalarǵa eskertý jasalady nemese - 2, qaıtalanǵan jaǵdaıda 5 AEK kóleminde ǵana aıyppul jazylady.
2021 jyldyń 1 qańtarynan Qazaqstanda 1 AEK - 2917 teńgeni quraıdy.
«Sonymen birge óńirlerdiń ekologııalyq problemalaryn keshendi sheshý boıynsha Jol kartalary qabyldanǵanyn, atalǵan qujattarda avtokólik shyǵaryndylaryn azaıtý baǵytynda atqarylatyn is-sharalar da qarastyrylǵanyn atap ótkimiz keledi. Mysaly, Nur-Sultan qalasynyń Jol kartasyna sáıkes, tehnıkalyq baıqaý ortalyqtaryna qoıylatyn talaptar qatańdatylady. Buryn tehbaıqaý pýnkterin ashqysy keletin kásipker ol týraly tek habarlaýǵa tıis bolsa, endi arnaıy ruqsat alýy qajet. Mundaı ortalyqtarǵa biryńǵaı baǵdarlamalyq qamtamasyz etý de engiziledi. Saqtandyrý polısin alý kezinde tehnıkalyq baıqaýdan ótý mindettemesi júkteledi. Sonymen qatar tehbaıqaý operatorynyń qyzmetin toqtata otyryp, mindetti tehnıkalyq baıqaýdy uıymdastyrý jáne ótkizý qaǵıdalaryn buzǵany úshin ákimshilik aıyppuldardy ulǵaıtý da qarastyrylǵan», - dedi Ekologııa mınıstrliginen.
Aıta keteıik, elimizde ekologııalyq talaptarǵa sáıkes kelmeıtin avtokólikter tehbaıqaý kezinde, Ekologııa departamentteri Іshki ister basqarmasynyń nemese kóliktik baqylaý organdarynyń birlesken reıdteri barysynda, kásiporyndarǵa júrgiziletin profılaktıkalyq tekserý kezinde anyqtalady. Avtokólikten shyǵatyn lastaýshy zattar normatıvteriniń saqtalýyn Ekologııa departamentteri gaztaldaǵysh «Avtotest», «Meta-01» jáne ózge de ólsheý quraldary arqyly tekseredi.
Eske salaıyq, 2021 jyldyń 2 qańtarynda Memleket basshysy Qasym-Jomart Toqaev Qazaqstan Respýblıkasynyń jańa Ekologııalyq kodeksine qol qoıdy.