Qazaqstanda ata-analyq mindetterin oryndamaıtyn 11 myńnan astam otbasy bar

ASTANA. KAZINFORM – Ortalyq kommýnıkatsııalar qyzmeti alańynda ótken brıfıngte Іshki ister mınıstrligi Ákimshilik polıtsııa komıtetiniń basqarma bastyǵy Aset Ospanov jaısyz otbasylarǵa qatysty suraqtarǵa jaýap berdi. 

– Búgingi tańda ishki ister organdarynyń esebinde ata-analyq mindetterin oryndamaıtyn 11 myńnan astam ata-ana tur. Kórsetkish ótken jylmen salystyrǵanda shamamen bir deńgeıde, aıtarlyqtaı ósý nemese tómendeý baıqalmaıdy, - dedi ol.

Jýrnalıster jaısyz otbasy mártebesin anyqtaýdyń qandaı krıterııleri bar ekenin surady.

– Mundaı jaǵdaılardy aıqyndaý úshin zańnamada birqatar krıterııler belgilengen. Atap aıtqanda, alkogoldik ishimdikterdi teris paıdalaný, balany tárbıeleý mindetterin oryndamaý, sondaı-aq balanyń turyp jatqan jerinde onyń oqýyna jáne damýyna qajetti jaǵdaıdyń jasalmaýy ata-analardy ishki ister organdarynyń esebine qoıýǵa negiz bolady, - dedi basqarma bastyǵy.

Sonymen qatar ol kámeletke tolmaǵandar isteri jónindegi komıssııalar jergilikti atqarýshy organdar janynda qurylatynyn atap ótti. Olardyń quramyna áleýmettik qorǵaý, oqý-aǵartý, densaýlyq saqtaý organdarynyń ókilderi, polıtsııa jáne prokýratýra qyzmetkerleri kiredi. Komıssııalar otbasylardyń jaǵdaıyn keshendi túrde qarap, ózara úılesimdi jumys júrgizedi.

Aıta keteıik, Konstıtýtsııa jobasynda otbasy, neke, ata-ana men balany qorǵaý máseleleri burynǵydaı memlekettiń erekshe qamqorlyǵynda qalady.