Qazaqstanda asyl tuqymdy mal ósirýge qatysty jańa talaptar aıqyndaldy

NUR-SULTAN. QazAqparat – Parlament Májilisinde «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly» zań jobasy tanystyryldy, dep habarlaıdy QazAqparat tilshisi.

Qujat jobasynyń maqsaty – asyl tuqymdy mal sharýashylyǵy júıesine ozyq halyqaralyq tájirıbeni engizýdi qamtamasyz etetin zamanaýı normatıvtik bazany qurý turǵysynda mal sharýashylyǵy salasyndaǵy zańnamany odan ári jetildirý.

Zań jobasymen «Ákimshilik quqyq buzýshylyq týraly» QR Kodeksine jáne «Asyl tuqymdy mal sharýashylyǵy týraly», «Selektsııalyq jetistikterdi qorǵaý týraly» jáne «Ruqsattar jáne habarlamalar týraly» QR Zańdaryna ózgertýler engizilýde.

Aýyl sharýashylyǵy vıtse-mırnıstri Gúlmıra Isaeva zań jobasynyń negizgi tustaryna toqtaldy.

«Ákimshilik quqyq buzýshylyq týraly» QR kodeksine sáıkes, asyl tuqymdy mal sharýashylyǵy salasyndaǵy zańnamany qaıtalap buzǵany úshin sýbektiler qyzmetterin toqtatatyn edi. Usynyp otyrǵan zań jobasynda talaptardy buzý jaǵdaılary joıylǵanǵa deıin sýbektilerdiń qyzmetin toqtata turýǵa tártibine aýysý kózdelgen. Osylaısha, jazalaýdyń tym qatal túrlerin belgileý asyl tuqymdy mal sharýashylyǵy salasyndaǵy qyzmetter sektoryn damytýǵa múmkindik bermeıtindikten, jaýapkershilik sharalaryn jeńildetemiz», - dedi vıtse-mınıstr.

Uǵymdyq aqparatta «asyl tuqymdyq qundylyq», «asyl tuqymdyq ónim», «aýyl sharýashylyǵy maldary», «asyl tuqymdy mal» jáne «selektsııalyq ári asyl tuqymdyq jumystar» termınderi Eýrazııalyq ekonomıkalyq odaq aıasynda aýyl sharýashylyǵy maldaryna selektsııalyq asyldandyrý jumysyn júrgizýdi birizdendirýge baǵyttalǵan sharalar týraly kelisimge sáıkes keltiriledi.

Jobanyń 10-babynda Qazaqstan Respýblıkasynyń asyl tuqymdy mal sharýashylyǵy júıesi asyl tuqymdy mal sharýashylyǵy salasyndaǵy respýblıkandyq palatalarmen, asyl tuqymdy maldy ósirýmen aınalysatyn jáne asyl tuqymdy ónimdi paıdalanatyn jeke ári zańdy tulǵalar, bonıterler, uryqtandyrýshy tehnıkter, embrıondardy transplanttaý jónindegi mamandarmen tolyqtyryldy.

Belgili bolǵandaı, 13 bapta ýákiletti organnyń quzireti kelesi ókilettiktermen tolyqtyryldy:

- asyl tuqymdy mal sharýashylyǵy salasyndaǵy

respýblıkandyq palattalardyń qyzmetine ádistemelik jetekshilikti júzege asyrý;

- malǵa ındekstik baǵalaýdy júrgizý qaǵıdalaryn ázirleý jáne bekitý;

- molekýlıarlyq-genetıkalyq saraptama júrgizý qaǵıdalaryn ázirleý jáne bekitý;

- ıppodromdarda asyl tuqymdy jylqylardy synaý qaǵıdalaryn ázirleý men bekitý.

«Sonymen qatar, respýblıkalyq palatarlardyń jaýapkershiligin zańdy deńgeıde bekitý týraly jańa bap qarastyrylýda», - dedi G. Isaeva.