Qazaqstanda asyl tuqymdy iri qaranyń Birinshi halyqaralyq ashyq aýktsıony ótedi
«Qazirgi tańda qazaqstandyq fermerler úshin Kanada, Avstralııa, Gollandııa sekildi basqa da elderge baryp, shetelden mal ákelýdiń múldem qajettiligi joq. Qazaqstannyń aýmaǵyna ákelingen asyl tuqymdy mal sany jetkilikti. Soǵan oraı, «ekinshi tól» atalatyn asyl tuqymdy iri qara malyn Qazaqstanda satyp alý, shetelden mal jetkizý men ony tasymaldaýda aıtarlyqtaı únem jasaýǵa múmkindik berip qana qoımaıdy, sonymen qatar jetkizý merzimin qysqartyp, anaǵurlym beıimdelgen maldy ıelenýge kepildik beredi. Búgingi tańda «QazAgroQarjy» Qazaqstanda týǵan 8 000 bas asyl tuqymdy maldy lızıngke berdi», - delingen baspasóz baıanynda.
Aıta keterligi, asyl tuqymdy tólderdi satý, negizinen aýktsıon arqyly júrgiziledi. Qazirgi kúnge deıin bes iri aýktsıon ótkizilip, onda fermerler asyl tuqymdy buqalardy óz qalaýynsha tańdaýǵa qol jetkizgen.
«Bıylǵy jazda, naqtyraq aıtqanda shildeniń 3-ine qaraı Qostanaı oblysynda Qazaqstandaǵy asyl tuqymdy iri qaranyń Birinshi halyqaralyq ashyq aýktsıony ótedi. Aýktsıonda 180 asyl tuqymdy buqa jáne 130 asyl tuqymdy Aberdın-angýs qasharlary shyǵarylatyn bolady. Bulardyń bir buqasynyń salmaǵy 800 keliden artyq bolatynyn aıta ketý kerek», - delingen baspasóz málimdemesinde.
Eske sala keteıik, «QazAgroQarjy» AQ iri qara mal etiniń eksporttyq áleýetin damytý baǵdarlamasyn birneshe kezeń boıynsha júzege asyryp keledi. Birinshi kezeńde Qazaqstanda mal basyn asyldandyryp býdandastyrý men kóbeıtý úshin shetelden ónimdiligi joǵary elıtaly etti mal ákelingen bolatyn. 2011-2014 jyldar ishinde «QazAgroQarjy» AQ elimizge barlyǵy 40 380 bas iri qara jetkizdi.
Al baǵdarlamanyń ekinshi kezeńinde mal basyn ári qaraı asyldandyryp, elimizde jalpy asyl tuqymdy mal basyn kóbeıtý maqsatynda, sheteldik mal tabynynan tól alyp, olardy búkil Respýblıka boıynsha taratý kózdelgen. Osy kezeń ishinde elimizdegi 85 asyl tuqymdy reprodýktor-sharýashylyq qarjylandyrylǵan. 12 myńnan astam asyl tuqymdy tólderdiń «ekinshi urpaǵy» alynǵan.
