Qazaqstanda astyq jınaý qazannyń sońyna deıin sozylýy múmkin
ASTANA. QazAqparat - Aýa raıynyń qolaısyzdyǵyna baılanysty Qazaqstanda astyq jınaý naýqany qazan aıynyń sońyna deıin jalǵasýy múmkin. Bul týraly «Habar 24» telearnasy QR Aýyl sharýashylyǵy mınıstrligine silteme jasap habarlady.
Atap ótilgendeı, sońǵy kúnderi aýa raıynyń qolaısyzdyǵyna baılanysty Soltústik Qazaqstan, Qostanaı, Aqmola jáne Pavlodar oblystarynda oraq naýqany toqtap qaldy. Aldaǵy aptada kún ashyq bolsa, dıqandar iske kirisýge daıyn.
QR AShM Ósimdik sharýashylyǵy ónimderin óndirý jáne qaıta óńdeý departamenti dırektorynyń orynbasary Aqpar Máýlenovtiń aıtýynsha, bıyl 15 mln gektar aýmaqtan astyq jınaý kózdelgen. Byltyrǵy jylmen salystyrǵanda ósimdik sharýashylyǵyn ártaraptandyrý maqsatynda bıdaı alqaby qysqartylǵan. Esesine, arpa, suly jáne maıly daqyldardyń kólemi ulǵaıtylyp otyr. Al kúzgi dala jumystaryn júrgizý úshin 394 myń tonna arzandatylǵan janar-jaǵarmaı bólindi. Búginde ár oblys belgili bir munaı zaýytyna bekitilip, keste boıynsha qajetti otynmen qamtamasyz etiledi.
«Bıylǵy boljanyp otyrǵan astyq kólemi 20 mln tonnadan astam. Onyń eksportqa boljanyp otyrǵan kólemi - 9 mln tonna. Onyń 6 mln tonnasy - bıdaı, qalǵany un túrinde jóneltiledi. Negizgi elder burynǵy naryq - Ortalyq Azııa, Aýǵanstan, Iran, Qytaı, Italııa jáne ózge taǵy birqatar memleketter», - dedi ol.
