Qazaqstanda astyq sapasy nelikten tómendep ketti
«Eger de 2011 jyly astyq sapasy 88 paıyzdy qurasa, 2016 jylǵa qaraı astyq sapasy eki esege tómendedi. Ótken jyly sapaly astyqtyń úlesi tek 44 paıyzdy qurady. Osy rette salada oryn alǵan júıelik problemalardy anyqtadyq, sondaı-aq ónimniń deńgeıin arttyrý boıynsha qajetti sharalardy qabyldadyq»,-dedi QR Aýyl sharýashylyǵy birinshi vıtse-mınıstri Qaırat Aıtýǵanov Úkimette ótken baspasóz máslıhatynda.
Onyń sózine qaraǵanda, astyq sapasynyń tómendeýine qolaısyz aýa-raıy men dándi daqyldardyń aýrýy yqpal etti. Sonymen qatar 2014 jyly elıtaly tuqymdardy sýbsıdııalaýdy toqtatý men sýbsıdııalaý kezinde eń tómengi normalardy belgileý sebep bolǵan kórinedi.
Eń tómengi normalardyń saldarynan aýyl sharýashylyǵy taýarlaryn óndirýshiler sapaly tuqymdy alýǵa qyzyǵýshylyq tanytpady, óıtkeni tómengi normamen tólenetin sýbsıdııalar olardyń shyǵyndaryn jappady. Nátıjesinde, egilgen elıtaly tuqymnyń úlesi 2014 jyldaǵy 6,3 paıyzdan, 2016 jyly 3,5 paıyzǵa deıin qysqardy.
Jaǵdaıdy túzetý úshin osy jyldan bastap biregeı jáne elıtalyq tuqymdy óndirý jumysy jańardy. Bıylǵy jyly tuqym sharýashylyǵyna bólingen bıýdjettik qarjynyń kólemi byltyrǵy jylmen salystyrǵanda 2 ese kóbeıgenin aıta ketken jón. Eń tómengi mólsherdiń kúshi joıylǵany fermerlerdiń sýbsıdııa alýǵa degen qyzyǵýshylyǵyn arttyra tústi.