Qazaqstanda astyq saqtaý qoımalarynyń jalpy syıymdylyǵy 27,5 mln tonna
«Mınıstrlik elevatorlardyń jańa astyq ónimin qabyldaýǵa daıyndyǵyna turaqty monıtorıng júrgizip otyrady. Respýblıkadaǵy astyq saqtalatyn jalpy syıymdylyq 27,5 mıllıon tonnany, onyń ishinde astyq qabyldaý kásiporyndarynda 12 mıllıon tonnany, aýyl sharýashylyǵy taýaryn óndirýshilerde 15,5 mıllıon tonnany quraıdy. Kórsetilgen saqtaý syıymdylyǵy ótken jyldardaǵy aýyspaly qaldyq kólemin eskersek, boljamdy túsimdi saqtaý úshin jetkilikti» - dedi Erbol Qarashókeev.
Onyń aıtýynsha, qazirgi kezdegi basty mindet – ósirilgen ónimdi ysyrapsyz jınaý.
«Qazgıdromet boljamy boıynsha kúzde respýblıkanyń basym bóliginde jaýyn-shashyn qalypty mólsherde bolady, soltústik-shyǵysta qalyptydan joǵary mólsherde bolýy múmkin ekenin eskerý qajet. Osyǵan baılanysty árbir qolaıly kúndi tıimdi paıdalaný, jumysty toqtatpaý, múmkin bolsa, egin jınaıtyn tehnıkanyń eki aýysymdyq jumysyn uıymdastyrý arqyly ónimdilikti joǵarylatý sharalaryn qoldaný kerek. Oblystar ákimderinen bul máseleni erekshe baqylaýda ustaýdy suraımyz», - dedi Erbol Qarashókeev.
Aıta keteıik, oblystar ákimdikteriniń derekteri boıynsha astyqtyń jalpy jınalymynyń boljamdy kólemi 15,3 mln tonna deńgeıinde bolady dep kútilýde.