Qazaqstanda astyq ónimdiligi nege tómen
ASTANA. QazAqparat - «Atameken» UKP ókilderi Qazaqstan astyǵy ne sebepti óziniń básekelestigin joǵaltyp otyrǵandyǵyn túsindirdi, dep habarlaıdy QazAqparat.
«Shynymen de, bıdaıdyń úlesi egis alqaptary qurylymynda 55 paıyzdan astam. Al ishki qajettilikke 9-9,5 mln tonna kóleminde kerek, onyń ishinde jem jáne tuqym qory da bar. Ótken jyly 20 mln tonna astyq bastyrylsa, sonyń 15 mln tonnaǵa jýyǵy bıdaı. Bul rette astyq pen un eksportyn eskere otyryp, jyl saıyn 7-8 mln tonna syrtqa shyǵaryp kelemiz. Sońǵy 5 jylda ortasha ónimdilik gektarynan 12 tsentnerden aspady, ıaǵnı bul kórsetkish 1 tonnadan sál astam. Ótken jylmen qarasaq, bir gektarǵa jumsalatyn shyǵyndar 35-40 myńdy quraıdy. Sonymen qatar, ónim quny da sol deńgeıde boldy. Gektarynan bir tonnany ala otyryp, tek jumsaǵan shyǵyndardy ǵana ótep otyrdy», - dedi «Atameken» UKP Agroónerkásiptik keshen jáne tamaq ónerkásibi departamenti dırektorynyń orynbasary Janna Aqysheva.
Onyń sózine qaraǵanda, basqa elderde jaýyn-shashynnyń dál osy deńgeıinde astyq shyǵymdylyǵy gektarynan 3-5 tonnaǵa deıin jetedi.
UKP ókilderiniń málimetinshe, sońǵy jyldary Reseıde tıimdi tehnıka men jaqsy tuqymdy paıdalaný esebinen astyq ónimdiligi kúrt artty.
«Bul neni bildiredi? Balamaly nusqa retinde joǵary tabys ákeletin daqyldarǵa kóshý kerek, ıaǵnı zyǵyr, raps, jasymyq, kartop egýge betburys jasaǵan jón», - dedi J. Aqysheva.
Onyń aıtýynsha, bir gektar kartopty ósirýge shamamen 450 myń teńge jusalady. Al bir tonna kartoptan túsetin paıda 55 teńgeni quraıdy. Ortasha alǵanda, bir gektardan 25 tonna kartop ósirýge bolady.
«Osy tektes ónimdi joǵaryda atalǵan daqyldardan da alý múmkindigi bar. Bul balamaly nusqalar, sáıkesinshe, tabysy joǵary daqyldarǵa kóshý kerek. Sonymen qatar, atalǵan daqyldar eksportqa negizdelgendikten, joǵary jalpy tabysty beredi jáne shyǵyndardyń ózindik quny da tómen», - Janna Aqysheva.
