Qazaqstanda astyq tasymaldaý tarıfi TMD elderi arasynda eń tómen

ASTANA. KAZINFORM – «Qazaqstan temir joly» kompanııasy astyq tasymaldaý tarıfin 2030 jylǵa deıin birtindep kóteredi. Bul týraly Májilistiń Agrarlyq máseleler komıtetinde astyqty tasymaldaýdyń ózekti máselelerine arnalǵan otyrysta «QTJ» ulttyq kompanııasy» AQ basqarýshy dırektory Daıyr Kósherov aıtty.

- Astyq tasymaly tarıfine keler bolsaq, ekonomıkany jańǵyrtý jónindegi memlekettik komıssııanyń sheshimi bar. Oǵan sáıkes, biz tarıfti 2024 jyldan 2026 jylǵa deıin jyl saıyn 24 paıyzǵa kóterýge tıispiz. Degenmen, 2024 jyly biz astyq tasymalynan 44 mlrd teńge zııan shektik. Tasymaldyń ózindik quny qazirgi tarıften 2 ese joǵary. TMD elderimen salystyrsaq, bizde eń tómengi tarıf, - dedi ol.

Osy rette QTJ ókili naqty mysal keltirip ótti.

- Aıtalyq, elimizdiń aýmaǵymen Saryaǵashqa deıin 2 100 shaqyrymǵa bir shaqyrymǵa 12 dollar tóleıdi. Al ózbek aýmaǵynda Galaba stansasyna deıin – 782 shaqyrym. Olarda tarıf 26 dollardy quraıdy. Eger tonna/shaqyrymdy esepteıtin bolsaq, ózbek tarıfimen aradaǵy aıyrmashylyq 6 ese. Olar tipti ózderiniń tutynýshylary úshin de baǵany túsirmeıdi, - dedi Daıyr Kósherov.

Onyń aıtýynsha, 2026 jyly da astyq tasymaly tarıfin 24 paıyzǵa kóterý josparlanyp otyr.

- Odan keıin ınflıatsııa deńgeıine baılanysty qarastyryp otyramyz. Bizdiń negizgi maqsatymyz - 2030 jylǵa qaraı birtindep tym bolmaǵanda ózindik quny deńgeıine jetý. Keıbir naryq qatysýshylary tarıfti birden 2 ese kóterip jiberedi dep alańdaıdy. Mundaı bolmaıdy, - dedi QTJ ókili.

Buǵan deıin Kólik vıtse-mınıstri Jánibek Taıjanov kólik salasy astyqtyń jańa ónimin tasymaldaýǵa tolyǵymen daıyn ekenin aıtqan edi.